Vawiin khan Agriculture Minister Pu C.Lalrinsanga chuan Mizoram Agriculture Service (MAS)-a lut thar officer sawmte lawmpuina leh fuihna hun a hmanpui.

Pu C.Lalrinsanga chuan Agriculture Department-a officer sawm lak thar an ni chu lawmawm a tih thu sawiin hei hian Agriculture Department-a thawktu indaihlohna nasa tak awm mek chu eng emaw chen a sutkian a beisei thu a sawi a. Hna ruak hnawhkhah tur la awmte pawh hnawhkhah thuai a nih theih nan Agriculture Department chuan theihtawp a chhuah zel dawn a ni, a ti bawk.

Agriculture Science-a thiamna sang tak tak nei mi 100 dawn lai he hna atana diltu an awm laia a tling sawm zinga tel thei an ni chu thil lawmawm tak a ni tiin Pu C.Lalrinsanga chuan officer tharte chu mawhphurhna sang tak an kovah nghahin a awm tih hre turin a chah a. Ei leh bara intodelh tura hmalakna kawng hrang hrangah an tel tak tak dawn a, chuvangin an thiamna, an tha leh ngaihtuahnate nasa lehzuala hmang tura beisei an ni, a ti. Agriculture Department chu loneitute enkawltu, ram mipui zaa sawmruk chuang lai innghahna an nih avangin Department pawimawh tak an ni a, tuma ngaihnep leh hlamchhiah theih an ni lo, Agriculture Minister chuan a ti a. He Department-a thawkte tan chuan inthlahdah leh zelthel a rem lova, officer tharte pawh an mawhphurhna zawn theuhah theih tawp an chhuah a tul dawn a ni, a ti.

He hun kaihruaitu Agriculture Commissioner leh Secretary ni bawk Pu Lalhmingthanga chuan hna ruak hnawhkhah a harsat viau tawh laia Mizoram Agriculture Service hnuaia hnaruak sawm hnawhkhah a ni chu lawmawm a tih thu a sawi a. Tunah hian MAS Grade-V post ruak 22 hnawhkhat leh thuai turin sawrkarah thlen mek a nih thu a sawi bawk. Agriculture Director Pu Rohmingthanga Colney chuan officer lak tharte inhmelhriattirna hun a hmang bawk a ni.