Khawzawl District Bawrhsap H. Lianzela chuan vawiin khan Neihdawn khua a tlawh a. Khawtlang hruaitute nen inkawmna neiin Neihdawn khawchhunga zirna in awm te leh MUP Run, YMA Hall, MHIP leh Health Sub-Centre te a tlawh a. Khawzawl leh Neihdawn inkar kawng laih mekte pawh a hmunah kalin a en nghal a ni.

Khawzawl District pian hnua Neihdawn khua a tlawhna hmasa berah hian Neihdawn khawtlang mipuite chuan  ropui takin Khawzawl Bawrhsap Pu H. Lianzela hi an lo hmuak a. D.C. Pu H. Lianzela chuan Neihdawn khawtlang mipuite chu hmathlir tha tak nei a ke pen a, faina kawng a nasa zawk a hmala tur leh thawkrim a indotelh tum turin a chah a. I.T hman thiam intihhmuh kawnga hma la tur leh hmang tangkai turin a fuih a ni. Zuk leh hmuam nasa zawk a do tur leh Environment humhalh turin mipui kalkhawmte a sawm a. Neihdawn khua a mi cheng te chu an khaw ti hming tha tur leh hmasawnna kawngah theihtawp chhuah turin a chah a ni.

D.C. lawmna puala vantlang inkhawm hi Neihdawn VCP Pu Zoramchhana kaihhruaina hnuaiah Neihdawn Community Hall-ah buatsaih a ni a. He hunah hian Neihdawn khuaa tlawmngai pawl hrang hrang hruaitute leh VC te telin Neihdawn khawtlang hruaituten D.C. hnenah hian khawtlang mamawh hrang hrangte an thlen a, hengte hi a theih anga bawhzui a tum thu Khawzawl  District Bawrhsap chuan a sawi a ni.