Sawrkar laipuiin eizawnna kawnga bultan duh leh intodelhna atana hma la duh apiang ten sum an puk theih nana inzirtirna leh awlsam zawka loan dilna a ruahman Customer Outreach Initiative Programme thawh khatna chu vawiin khan Convention Centre Lungleiah hman a ni a, Lunglei HPC Vice Chairman Pu Lawmawma Tochhawng chuan khuallian niin he hun hi a hmanpui a ni.

He Gharak Mela hawnna inkhawm ah hian Pi C. Lalremtluangi Chief Manager, SBI Lunglei branch chuan kal khawmte lawmna thu sawiin tangkai taka he Bank Mela hi mipuiin inthlahrung miah lova hmanga loan puk chungchanga an hriat duh leh an mamawhte tlangnel taka zawhna hun atan hmang tura a duh thu a sawi a ni.

Khuallian Pu Lawmawma Tochhawng chuan thu sawiin amah ngei pawhin kutbenga a awm laia Bank loan hmanga bul tan a nih dan leh tangkai taka chhungkaw eizawnna bul tan nan a hman thu a sawi a,Bankleh mipuite chu intung nung tawn anih anga inhriatthiamna nen kal a tul thu sawiin Bank-a thawktute pawhin mipui dawr kawngah zaidamna leh zawldawhna nen theihtawp chhuaha an hna an thawh a tul thu sawiin, mipui pawhin Bank hnathawh hun leh hmun ngaipawimawha dawr thin turin kalkhawmte a chah a, ram leh mipuiin tangkai taka Bank Mela chu an hman turin a hawng a ni.

He Bank Mela ah hian Bank hrang hrang atanga loan dil mekte lak phalna Tokken chu khuallian Pu Lawmawma Tochhawng chuan a sem nghal a, Pu LP Lalchangkima, Regional Manager & Convenor of SLBC, SBI Lunglei pawhin Gharak Mela chung chang sawifiahna hun a hmang bawk a ni.

Vawiina Gharak Mela-ah hian Lunglei chhunga Bank hrang hrang ten Stall buatsaihin mipuiin loan puk dan kalhmang leh kawng hrang hranga Bank hmalakna bakah a dawr dan chung chang inzawhna leh inhrilhfiahna hun hman nghal a ni a, he Mela hian naktuk Inrinni thleng a awh dawn a ni.