Vawiin chawhnu khan Health and Family Welfare etc changtu Minister leh South Tuipui Assembly Constituency bialtu MLA ni bawk Dr R Lalthangliana chuan Mizoram Cooperative Apex Bank (MCAB) Branch 20-na ni turin Hnahthial MCAB Branch a hawng. Hawnna inkhawm hi PC Lalzama (L) Building, Bazar Veng Hnahthialah neih a ni. He hunah hian Aizawl atanga Minister rawn tawiawmtu official-te leh party hruaitute, Hnahthial DC Pu Vanlalmawia, SP Pu Devesh Kumar Mahla leh Lunglei District leh Hnahthial District official-te, MCAB hotute, Hnahthial MJA-te leh Hnahthial leh a chhehvel khaw hrang hranga mipui thahnem tak an kalkhawm.

Hawnna inkhawm Pi T. Lalmuanpuii, Chairman MCAB kaihhruaiah Minister chuan thu sawiin Bank leh Banking products hrang hrang te ram changkang apiangin an hmang tangkai a ni tiin Mizo din ngei MCAB Branch chu Hnahthial District tan hmasawnna mellung pawimawh tak a ni, a ti a. Tunlai khawvelah bank tel lovin hmasawnna hna kalpui a harsat thu sawiin mipui kalkhawmte chu MCAB Branch thar chu tangkai taka hmang turin a fuih a. Mizoram sawrkarin Bank a ngaih pawimawh thu pawh sawilangin Minister chuan SEDP thiltumte ti hlawhtling tur leh hmasawnna hna kalpui turin Mizoram hmun hrang hrang ah Bank Branch hawn chhunzawm zel an tum thu a tarlang bawk. District thar hnuaia hmasawnna awm zel tur te pawh sawilangin Minister chuan Hnahthial Hospital thawm that a nih tur thu leh hmanraw dah belh zel a nih tur thu te, Department office hrang hrang hawn zel anih tur thu te, Hnahthial District tan Convention Centre changtlung tak buatsaih a nih tur thu te kalkhawmte a hrilh a ni.

He hunah hian Hnahthial DC Pu Vanlalmawia, Hnahthial Town VC Association President Pu C. Lalbuatsaiha te pawhin thu sawiin Pu Lalzuahliana, CEO MCAB in lawmthu sawiin hun a khar a ni.

Minister hi Aizawl atangin Health & Family Welfare Department Principal Director Dr F. Lallianhlira leh official engemawzat leh party hruaituten an rawn tawiawm a. Hnahthial ah District Hospital tlawhin Medical officer Dr Lalrengpuii Ralte leh Hospital hnathawkten anlo dawngsawng a, hmasawnna hna kal mek leh an mamawh te sawi puiin damlo awmte a kan bawk a ni. Tin, Hnahthial District DC office hmun, Commerce and Industries office ruahmanna tur te pawh Department official-te nen en hovin Aizawl lam panin an haw leh a ni.