Vawiin khan Patent Information Centre, Mizoram Science, Technology & Innovation Council (MISTIC), Directorate of Science & Technology chuan Mizo puan panga- Tawlhlohpuan, Mizo Puanchei, Pawndum, Ngotekherh leh Hmaram ten Geographical Indication (GI) register an hmuh hnuin Art & Culture Department hnenah document hlanna an nei.

GI document hlanna hun hi Secretariat Conference Hall, New Capital Complex, Aizawl ah hman a ni a, khuallian Dr. C. Vanlalramsanga, Secretary, Planning chuan heng hun an thleng hi lawmawm a tih thu a sawi a, Mizo tena kan puan neih ang te humhim a nih theihna kawnga hmalak a nih hi a finthlak thu sawiin, Mizo hnam nena lak hran theihloh thil dangte pawh GI a nih theih nana hmalak a tulzia a sawi. Mizo puan GI atang hian puan tah tute pawhin hlawkna tam zawk an neih ngei theih a beisei thu a sawi.

Khualzahawm Dr. Lalzirmawia Chhangte, Secretary, Art & Culture Department leh Pu R. Hmingthanzuala, Director, Art & Culture Department-te pawhin thusawina hun neiin Mizoten kan puan pawimawh tak takte neitu nihna diktak kan chang ta hi a lawmawmzia an sawi a, heng kan puan rohlute hi a nihna ang diktaka vawn a tulzia an sawi bawk.

He hun hi  Dr. R.K. Lallianthanga, Chief Scientific Officer (MISTIC) –in a kaihruai a, Dr.Samuel Lalmalsawma, Senior Scientific Officer in report kimchang a pe bawk a ni.