Vawiin chawhma khan Hotel Regency, Zarkawt, Aizawlah North Eastern Handicrafts and Handlooms Development Corporation Ltd (NEHHDC),  North Eastern Council (NEC) leh Women’s Polytechnic, Aizawl tangkawp buatsaih ‘Awareness Workshop For Artisans And Weavers Cum Spot Purchase Of Handlooms And Handicrafts’ neih a ni a, Shri Prasant Kumar Jha, OSD to Hon’ble Minister, DoNER chu khuallian niin Pu C Ramhluna, Vice Chairman, Mizoram Industrial Development Board chu khual zahawm a ni bawk.

Khuallian Shri Prasant Kumar Jha, OSD to Hon’ble Minister, DoNER chuan Mizo hmeichhiate chu eizawnna kawng hrang hranga hma la thintu an nih avangin fakawm a tih thu a sawi a, Plastic hman tih tlem kawnga hmalakna kal mekah Plastic aia Mizorama tha duh em em, Mau hman tangkai thiam a pawimawh thu a sawi bawk. Shri Prasant Kumar Jha chuan kalkhawmte chu an eizawnna an hriat chian a pawimawh rualin an thil siam chhuah lei tura an duh te (target consumer) hrechiang zual turin a chah a, Mizoram chu India rama state ralmuang ber a nih angin thil siam chhuah leh hralh chhuah kawngah pawh midangte aia an vanneih thu a sawi bawk.

Vawiin awareness workshop hi Pi L Lalrodingi, Adviser, BIT, NEC in a kaihruaia Shri D Thakuria, MD, NEHHDC in hun kalpui dan tur tlangpuite tar langin Pu C Ramhluna, Dr S Chaudhari, MD, Cane and Bamboo Technology Centre leh Pi Susan R Ralte, Lecturer, Women’s Polytechnic ten thu sawina hun an hmang bawk a ni. Technical session ah hian Handicraft leh handloom lama eizawnna leh sumdawngte tana hriat tur pawimawh tak takte inzirtirna hun neih a ni a, Pu Lalhruaizela, Branch Manager, NEDFI, Pu H Lalchamrela, District Project Manager, NERLP, Pu SK Sen, Weavers Service Centre, Pu C Lalrinmawia, Commerce & Industries Department leh Pu Laldinmawia, Mizoram Bamboo Industries Association ten zirtirna an pe a ni. Awareness Workshop-ah hian mizo puan tah, designer, puan hmanga eizawngte leh Women’s polytechnic zirlaite an tel a, a hmunah hian mizo puan hmanga thil siam hrang hrang phochhuah a ni bawk a ni.