1300/2023-2024

Aizawl, 28.07.2023: Agriculture Minister Pu C. Lalrinsanga chuan vawiin khan IFAD-FOCUS buatsaih Buyer-Seller Meet 2023 chu Millenium Centre rooftop ah a hawng. Farmer thlai thar leh processed food an siamchhuah te hralhchhuahna tur awlsam zawka dap sak tura buatsaih a ni.

Agriculture Minister chuan kuthnathawktute’n mumal zawka buyer nghet leh rintlak an neih theih nan a buyer-seller meet FOCUS in a buatsaih chu lawmawm a ti a. Climate change karah kuthnathawktute sum lakluh a lo tam zawk nan kawng hrang hrangah a department chan chuan hma a lo lak thin thu sawiin, kawng hrang hrangah pawh hlawhtlinna awm tawh thu leh hmabak la awm te a sawi a. Thlangram lo neih - jhum cultivation leh thlai bulfuk neilo a thlai chin thlakthleng reng chuan hlawkna a pawthniam nia a hria thu sawi bawkin, Agriculture Minister chuan tun hnaia IFAD leh FOCUS terrace a lo neih kalphung thar IFS-CADA (Integrated farming System - Compact Area Development Approach) bul an tan chuan beisei sang tak a siam thu a sawi bawk. Minister Pu C. Lalrinsanga chuan agriculture leh farmer te hmasawnna tura hmalakna hrang hrangte chu hlawhtling lehzuala siam turin heng project leh mission hrang hrangte hi a remchanna apiangah a kalkawp a thawhho (converge) tha a tih thu leh ruahman a nih thu a tarlang. Minister chuan hun kal zel turah buyer-seller meet lian zawk leh huam zau zawk a la awm zel a beisei leh duhsakna thu a hlan bawk.

He meet hawnna programme hi Pu V. Ruatsanga, Addl. Secretary, Agriculture Department chuan kaihruaiin, FOCUS hmalakna chungchang presentation en ho a ni bawk a. FOCUS State Project Director Pu R. Lalnunzira chuan lawmthu sawina a nei bawk. Agriculture Department Deputy Director Pu Lalhmingmuana kaihhruaiin inkawmkhawmna hman chhunzawm a ni.

IFAD-FOCUS Mizoram project hi Mizoram district paruk (Champhai, Kolasib Serchhip, Mamit, Khawzawl leh Saitual) ah te kalpui a ni a. District tinah hian Farmer Interest Group (FIG) din a ni. FIG te hi group hrang hrangah then darh leh niin, group khatah hian mi 15 atanga 30 vel zel an awm a. FIG then hran dan hrang hrangte chu hetiang hi a ni:

Heng FIG hrang hrangte hi support/assistance District Management Unit (DMU) kal tlangin pek thin an ni a. Heng support/assistance zingah hian thlai leh thei chi hrang hrang FIG te hi season mil a pek chhuah thin an ni. Chung zinga langzar zualte chu – Mizo Chilli, Ginger, Mandarin Orange, Tomato, Off season Cabbage, Dragon Fruit, Potato, Banana, Maize, Arecanut te an ni. An tharchhuah ah Value addition leh processing an tih theih nan Innovation Fund leh Market Access Facility Scheme te FOCUS hnuaiah hian a la awm bawk a ni. Heng bakah hian FIG te loneihna kawng siam that te (farm link road), tui dah khawlna siam (water storage structure), check dam sak te pawh kal pui a ni bawk.

FIG hnuaia thlai leh thei chin te hi thar chhuah a nih in, a hralhna lamah harsatna an tawk thin a. Market channel mumal zawk bakah buyer nghet FIG ten an neih theih nan hian hmalak pui an ni a. Heng an harsatnate te hi hriatpuiin, FOCUS Mizoram chuan an hmakhua ngaiin Buyer Seller Meet hi a buatsaih ta a ni. Buyer Seller Meet ah hian Aizawl chhung a thlai leh thei lama potential buyer hrang hrang (vegetables & fruits market players, entrepreneurs, restaurants, marts etc) 50 chuang lo tel tura sawm an ni.

Buyer Seller Meet ah hian FIG te hian potential buyers hrang hrang te nen in dawr na hun leh sumdawnna chungchang a an inthlunzawm theih dan tur sawiho na leh inbiak remna hun tha tak an nei a ni.