Vawiin chawhnu khan Agriculture Minister leh Lunglei West AC bialtu MLA ni bawk Pu C. Lalrinsanga chuan School of Nursing, Christian Hospital Serkawn (CHS)-ah General Nursing & Midwifery (GNM) zirlai pass thar 17-te Graduation lawmna leh GNM zirlai thar 20-te lawmluhna Lamp Lighting Ceremony a hmanpui. He hunah hian Lunglei South bialtu MLA Dr K. Pachhunga leh sawrkar official-te, BCM hotute leh CHS a hnathawkte, MJA Lunglei hruaitute leh zirlai nu leh pa thahnem tak an kalkhawm.

Pu C. Lalrinsanga chuan GNM zirlai thar leh zirlai graduate thar te a lawmpui thu sawiin nurse hna chu hna zahawm tak, damlo leh enkawl mamawh tute tana nun hlanna, rawngbawlna ropui tak a ni, a ti a. Zirlaite hnenah fuihna thu sawiin Minister chuan an damlo enkawlte chu hmangaih taka enkawl thin tur leh an thutiam hre renga chi leh hnam, mipa leh hmeichhia, sakhua, rethei leh hausa te thliar lova theihtawp chhuaha, missionary thinlung pu tlat chunga an hna thawk zel turin a chah a. Ram leh hnam vei tak takna rilru nen mahni zawn theuha thahnemngai taka ke kan pen theuh a tul a ni tiin kalkhawmte chu hemi kawnga inhlanthar theuh turin a sawm a. Christian Hospital Serkawn (CHS) doctor leh nurse te thawhrimna leh inpekna chu fakawm a tih thu sawiin mi harsa leh natna khirh tak tak vei te thahnemngai tak leh hmangaih taka an lo enkawl thin avangin an chungah lawmthu a sawi bawk.

GNM Graduation & Lamp Lighting Ceremony hi Auditorium, School of Nursing-ah neih niin Dr B. Laldinliana, Medical Superintendent, CHS in a kaihruai a. Pi Vanlalthlengliani, Principal, CHS in zirlaite inhmelhriatna hun hmangin Pi T. Rozami, Principal , School of Nursing Lunglei in zirlai tharte tana ‘Capping & Lamp Lighting’ hi a kaihruai a ni. Lawmman hlanna hun pawh hman nghal niin ‘Biaklianzuali Award’ chu H. Lalhmangaihzuali D/O H. Jonathan, Ramzotlang Serkawn hnenah hlan niin ‘Best Graduate 2018’ chu C. Vanlalkimi D/O C. Zonunsanga, Bazar Veng Lunglei hnenah hlan a ni.

Minister hi Dr J. Lalzamliana, Director, Agriculture (CH), Pu Lalrotluanga, Chief Engineer, I&WR leh Pu K. Lalthanpara, Jt RCS Cooperation Department ten Aizawl atangin an rawn tawiawm a ni.