No.7678/2020-2021

Agricultural and Processed Food Products Export Development Authority (APEDA) leh Commerce & Indutries Deparment, Government of Mizoram tangkawpin an buatsaih nihnih awh tur "Export Promotion Conference-cum-Buyer Seller Meet" chu vawiin khan Agriculture Minister Pu C. Lalrinsanga'n Aijal Club Conference Hall-ah a hawng.

Conference hawnna inkhawmah khuallian Pu C. Lalrinsanga chuan thu sawiin,COVID-19 hripui leng avangin agriculture leh a kaihhnawihte bakah Micro, Small and Medium Enterprises (MSMEs) ten nasa takin harsatna an tawk a, hetih rual hian thil lawmawm deuh lo lang chu kan thalaite zingah primary sector leh entrepreneurship lama harhtharna a lo thleng ni a lang hi a ni, a ti a.Mizoram sawrkar pawhin hei hia tuipuiin hetiang lama tuite chu theihtawpa dawm kan a tum a, hetiang boruak kan tawn mek nena inhmeh tak mai programme APEDA leh Commerce & Indutries Deparment in an buatsaih hi a lawmawmin rah tha a chhuah ngei ka ring a ni, a ti.

Minister chuan COVID-19 hripuiin min kiansan a, a tak taka hnathawh thuai thuai theih hun a nghahhlehawm tawh hle a, loneitute thawhchhuah a leta tihpun tumin Agriculture Department chuan theihtawp a chhuah a ni, a ti a. District hrang hrangah KVK kaltlangin OP-12 bio fertilizer unit, Bio-control laboratory leh seed bank kan buatsaih mek a, organic farming pawh chak taka kalpuiin tunah hian MOVCD-NER Scheme hnuaiah ram hectare 14,000 a zau ah hma kan la mek a, kum 2021 kum tawpa hectare 7000 dang tih belh hman turin theihtawp kan chhuah a ni, a ti a. Loneitute chu an tharchhuahte hlawk lehzuala an thar theih nan leh, a hralhchhuah lam thlenga hlawk zawka an kal theih nan theihtawp chhuahin sawrkarin hma a la ti a sawi bawk a ni.

Dr. BS Negi, Advisor(NAB) APEDA pawhin thu sawiin, Agricultural and Processed Food Products Export Development Authority (APEDA) hi Agricultural and Processed Food Products Export Development Authority Act, 1985 tlawhchhanin April ni 30, 1986 khan din a ni a. Loneitute leh kuthnathawktute hmasawnna chu a ngaihtuah ber a nih angin Export Promotion Conference-cum-Buyer Seller Meet hi India ram hmun hrang hrangah kan buatsaih thin a ni, a ti a. Buyer Seller Meet in a tum ber chu Mizo kuthnathawktute thei leh thlai tharte India ram state dangah te leh ram pawn thlenga thawn chhuah theih dan ngaihtuah tlan a ni, a ti a. Thenawm ramte nena in kalpawhna tha a awm hunah chuan tun aia awmze nei zawk leh hlawk zawk hian kuthnathawktute tharchhuah pawh kan hralh theih a beiseiawm a ni, a ti.

Export Promotion Conference-cum-Buyer Seller Meet ah hian Mizoram chhung hmun hrang hrang atang kuthnathawktute leh entrepreneur te an kalkhawm bakah India ram hmun hrang hrang atangin Company 14 aiawh an tel a ni.

APEDA Head Office hi New Delhi ah awmin, Mumbai, Kolkata, Bangalore, Hyderabad leh Guwahati ah Regional Office an nei a. State sawrkar nen tangkawpin India ram State/UT 13 - Thiruvananthapuram (Kerala), Bhubaneshwar (Orissa), Srinagar (J&K), Chandigarh, Imphal (Manipur), Agartala (tripura), Kohima (Nagaland), Chennai (Tamil Nadu), Raipur (Chattisgarh), Ahmedabad (Gujarat), Bhopal (Madhya Pradesh), Lucknow (Uttar Pradesh) leh Panaji (Goa) ah Virtual Office an hawng bawk a ni.