No.7679/2020-2021

Vawiin khan Lawngtlai District Task Force Immunisation (DTFI) chu an Chairman, Lawngtlai Bawrhsap Dr Andrew H. Vanlaldika hovin DC Conference Hall-ah an thu khawm a. Lawngtlai District-a COVID-19 hri danna (vaccine) pek mek chungchang leh hma lak zel dan tur an sawi ho.

He thut khawmah hian District Immunisation Officer Dr S. Thaizi bakah, health department, police, Assam Rifles, BSF, BRO, VC Association, kohhran leh tlawmngai pawl hrang hrang ai awhte leh chanchinbu mite an tel a. Member Secretary, District Immunisation Officer Dr S. Thaizi hnen atangin healthcare worker leh frontline worker-te hnena COVID-19 hri danna 1st dose leh 2nd dose pek tawh dan report ngaihthlak a ni a. VLTF, force hrang hrang, kum upa leh natna khirhkhan zual neite hnena COVID-19 hri danna pek dan tur ruahmanna te sawi ho a ni.

COVID-19 hri danna chu January ni 19, 2021 khan Lawngtlai District-a healthcare worker (doctor, nurse, health worker, ASHA leh anganwadi worker & helper)-te hnenah pek tan niin, a thawh khatna (1st dose) hi mi 700-in an la a. February ni 17, 2021 atang khan healthcare worker-te hnenah 2nd dose leh frontline worker-te hnenah 1st dose pek chhuah ve leh niin, healthcare worker 2nd dose la mi 473 leh frontline worker 1st dose la mi 117 an awm tawh a, a hmasaa la hman lo healthcare worker 1st dose la mi 18 an awm belh bawk. Heti hian tun dinhmunah Lawngtlai District-ah healthcare worker zinga hri danna an lak tur zat (vawi 2) la kim tawh mi 473, vawi khat chauh la la mi 245 leh frontline worker zinga 1st dose la mi 117 an awm mek a ni.

Thawktute ruahman dan chuan, COVID-19 hri danna hi March ni 5, 2021 atang hian pek chhunzawm leh tur a ni a. Frontline worker hri danna pek hmabak la awm (VLTF leh force lam)-te bakah, kum 60 chung lam hri danna la duh te, kum 45 leh kum 59 inkar natna khirhkhan bik (zunthlum leh thisen sang, adt.) nei ang chi te hnenah hri danna hi pek leh tur a ni dawn a. Bungtlang 'S' leh Vaseitlang-ah March ni 5 & ni 6; Parva, Zorinpui leh Tuithumhnar-ah March ni 9 & ni 10; Lawngtlai-ah March ni 8, ni 9 & ni 10-ah te pek chhunzawm a ni dawn a ni.

Hri danna la thei tur hian VLTF member-te chu DC office-ah an hming leh nihna kimchang theh luh a ngai dawn a; kum 60 chung lam leh kum 45 - 59 inkar natna khirhkhan bik nei, hri danna la duhte chu mahni bialtu ASHA/health worker-te hnenah inhriattir tur a ni thung. Hri danna la thei turte chu hri danna pek ni-ah a hmunah kalin, Voter ID Card leh Aadhaar Card ken tur a ni a; mahni hman lai ngei phone number hmanga inziah luh a ngai dawn bawk a; kum upa, mahnia phone nei lote chuan an chhungte phone number chhinchhiahin, ziaka ken mai tur a ni.