Vawiin khan Agriculture Minister Pu C.Lalrinsanga chuan Fostering Climate Resilient Upland Farming Systems in the North East (FOCUS) Mizoram Project Management Office chu Mizoram New Capital Complex (MINECO)-ah a hawng.
Pu C.Lalrinsanga chuan FOCUS hi United Nations agency pakhat International Fund for Agricultural Development (IFAD) hnuaia project niin sik leh sa inthlak nasa global warming leh climate change khawvelin a tawn mek hrula hmasawnna hna thawhna tura hmalakna pawimawh tak a ni, a ti a. Sik leh sa inthlak danglam nasain kan eizawnna ber thlai thar leh tlangram lo neih a tihbuai chhoh mekah lo neitute kawng kawhhmuh a, technical guidance pe turin FOCUS hi din a ni, a ti. Pu C.Lalrinsanga chuan FOCUS-a thawktu zawng zawngte Mizoram mipuite tana hnathawk an nih inhre turin a fuih a, ngaihtuahna thar pu tur leh FOCUS thil tum hlen chhuak ngei tura hna thawk turin a chah a. Kan ram economy siam tha tur leh hmasawnna tur ngaihtuaha ke pen tumna boruak nasa tak thalaite zingah a inmung mek a ni, a ti bawk.
FOCUS project in a tum ber chu thingtlang lo neiha eizawng chhungkaw 64,500 ten thlai hlawk zawka an thar chhuah theihna tura tih hmasawn leh kum tin lo hal avanga sik leh sa inthlak danglam nasa lutuk tih ziaawm a ni a. Zawi zawia tlang ram lo vah leh lo hal kalsan a, sik leh sa mil a thlai kum hlun hmanga lo neitute sum dehchhuah tih pun a tum a ni. He Project hi hlawm thuma then a ni a, chung te chu - thingtlang lo neih tih hmasawn, man man zawka ran leh thlai thar chhuahte deh ral theihna tura ruahmanna siam leh project management leh thiamthil inzirtirna te a ni a. Khaw 272 leilung hmandan ruahmmana neih tir te, loneitu 1,08,800 te hnena ram hman tangkai dan zirtir te, loneitu 27,200 te hnena ngelnghet zawka lo neih dan zirtir te, ram neilo chhungkua 10,880 te tanpui te, chhungkaw 25,000 te vawk vulh atanga hlawkna tel tir te chu he project tihhlawntlin tum tur zingah a tel a ni.
IFAD atangin FOCUS Project atan hian loan US dollar maktaduai 35.25 ruahman a ni a. FOCUS project hian Agriculture, Horticulture, Animal Husbandry & Veterinary Department leh Land Resources, Soil and Water Conservation Department te a huam a. Agriculture Department hi nodal department a ni.
Vawiin programme hi Agriculture Secretary Pu Lalhmingthanga’n a kaihruai a. AH&Vety Deputy Director Dr.Lalhmingthanga’n FOCUS nihphung tlangpui a sawifiah. Hawnna programme neih zawh hnu hian Mizoram District hrang hranga District Management Unit (DMU)-te hman tur bike 16 leh scooty 8 te chu Minister hian a vailiam bawk a ni.
He programme ah hian ZIDCO Chairman Pu Lalthlengliana, Agriculture Development Board Member te leh mi pawimawh dang te an tel a ni.
