No.8/2021-2022

Aizawl, 1st April, 2021: Vawiin khan Foundation for Drug Free Mizoram buatsaih High Council Meeting chu HYVE Aizawl City Hall, Tuikual South-ah neih a ni a. He hunah hian Pu C.Lalrinsanga, Agriculture Minister chu khuallian a ni a, Pu H.Biakzauva MLA, Vice Chairman, Agriculture Development Board chu khualzahawm a ni.

Khuallian Pu C.Lalrinsanga chuan ram leh hnam tana taima taka theihtawp chhuaha intodelh tura tan la hi tam ila drugs leh ruihtheih thil danga buai hi kan tlem sawt ang, tiin a sawi a. Thalai tam tak tuna drugs bawiha tang mek te hi chhungkaw tam takin an buaipui a, a la fihlim te hian an chhungkua a luhchilh ve lohna turin nasa taka tan an lak a ngai a ni, a ti a. Drugs bawiha tang mek te chhanchhuak tur leh a fihlim ten an tih ve lohna turin sawrkar, kohhran, tlawmngai pawl, chhungkua leh mimal tin ten mawh kan phur a ni tiin a sawi bawk a ni.

Khualzahawm Pu H.Biakzauva pawhin thu sawiin sawrkar chhinchhiah danin school naupang zingah drugs ti chin leh a ngawl pawh vei hial an awm tih chhinchhiah a ni, a ti a. Class 1 leh Class 12 inkarah zirlai zawng zawng pek turin drugs leh ruihtheih thildang nghawng leh ruihhlo hmang sualtute hrem dan inziahna Module buatsaih a ni a, hei hian a bikin school naupangah awareness a tuh a rin thu a sawi bawk a ni.

He hunah hian AMC Councillor tling thar lawmpuina sem a ni a, Prof H.K Laldinpuii Fente chuan thusawina hun a nei bawk a. Life Member leh Patron Member Certificate hlanna hun hman a ni bawk a ni.