No.3650/2020-2021

Vawiin khan Agriculture Department hmalakna thar lian tham leh pawimawh tak United Nations Food and Agriculture Organization (FAO) hnuaia Green-Ag: Green Landscape Implementation Unit (GLIU) chu Agriculture Minister Pu C.Lalrinsanga chuan Agriculture Complex, Lunglei ah a hawng.

He hunah hian Lunglei HPC Vice Chairman Pu Lawmawma Tochhawng, Pu Lalhmingthanga, Commissioner & Secretary, Agriculture Department, Pu Rohmingthanga Colney, Director of Agriculture (Crop Husbandry) leh Lunglei District Head of Office-te, Agriculture Development Board member-te, Lunglei MJA leh YMA hruaitute leh party hruaitute an tel a ni.

Hawnna inkhawmah Agriculture Minister Pu C.Lalrinsanga chuan Green Landscape Implementation Unit (GLIU) chu hmasawnna huap zau leh daih rei tak kan neih theihna tura duang anih thu sawiin he project hnuaiah hian Agriculture Department hmalaknate chu ramngaw leh nungchate humhalh chunga kalpui anih tur thu a sawi a. He Project hi Lunglei District chhunga Thorangtlang Wildlife Sanctuary leh Mamit District huam chhunga Dampa Tiger Reserve-te chhehvel khaw 30-ah bul tan tum niin khaw dang pawh telh belh zel tum an nih thu a sawi.

A sawi zel naah Agriculture Minister chuan khawvelin hun harsa tak a tawh mek laia India ram pawn atanga tanpuina Global Environment Facility (GEF)-in India ram State 5 a pek zinga Mizoram a rawn thlang ve hi lawmawm a tih tu sawiin, he program hnuaia hmasawnna tura ruahmanna siamte chu a huam tur khua te tan malsawmna nasa tak a nih ngei a beisei thu a sawi a. India ram State panga thlanchhuah – Madhya Pradesh, Mizoram, Odisha, Rajasthan leh Uttarakhand te zingah Mizoram chu hma la chak ber niin GLIU Office peih hmasa ber leh a thawktu tur te pawh ruahman fel hmasa ber an nih thu sawiin theihtawp chhuaha hma la tu Agriculture Department hnathawktute inpekna leh thawhrimna chu fakawm a tih thu a sawi a. He project hian nghawng thui tak ala nei zel dawn a ni tiin Agriculture leh ramngaw humhalh lama hmasawnna piah lamah kuthnathawktute tan eizawn ngelnghet leh eco tourism lam thlengin hmasawnna nasa tak a thlen tur thu a sawi a. He project huapzau tak hi Agriculture Department chauhin a ti hlawhtling theilo a ni tiin Line Department hrang hrang leh District administration-te thawhho puia hmalak puiah a sawm a ni.

He hawnna inkhawm DAO Lunglei Conference Hall-a neih hi Pu Lalhmingthanga, Commissioner & Secretary, Agriculture leh State Steering Committee Chairman ni bawkin a kaihruai a, Mizorama he project din chhoh a nih dan leh hma lak dante kim chang takin a sawi lang.

He project hi kum 6 (01 April 2019 to 31 March, 2026) chhung atana ruahman niin Project kalpui tur hian State thlanchhuah panga te Budget intawm chu USD 33,558,716 a chhut a ni. GLIU project kalpui a nih chhung hian a huam chhunga khaw hrang hrang a loneitute hmasawnna tur kawng chi hrang hrang bakah ramngaw leh nungcha humhalh te, project a zawh hnu pawh a eizawnna ngelnghet neihna tur lam hawi a hmalak a ni dawn a ni.

Hawnna inkhawm ah hian Pu Rohmingthanga Colney, Director of Agriculture (Crop Husbandry) leh State Project Director ni bawk pawhin thu sawiin he project hi Agriculture Department leh a kaihhnawih Department dangte nena thawhho tur a nih thu sawiin hna thawh dan tur tlangpui a sawi lang nghal bawk.

He project enkawltu tur hi State Project Management Unit (SPMU), Aizawl leh Green Landscape Implementing Unit (GLIU) te Lunglei leh Mamit-ah awmin hemi a thawktu tur Staff te pawh lak fel an ni tawh a ni.

Green-Ag Project hi a Funding Agency chu Global Environment Facility (GEF) niin a Implementing Agency chu United Nations Food and Agriculture Organization (FAO) a ni a. Sawrkar laipuiah Ministry of Agriculture & Farmers’ Welfare leh Ministry of Environment, Forests & Climate Change te hnuaiahniin Mizoram Sawrkar hnuaia State Nodal Agency chu Department of Agriculture (Crop Husbandry) a ni.