No.3649/2020-2021

Lawngtlai, Vawkhniahzawn thla ni 31, 2020: Vawiin khan Horticulture Department, Lawngtlai Division chuan Mission for Integrated Development of Horticulture (MIDH) 2019-2020 hnuaiah Lawngtlai chhehvela theihai leh lakhuihthei chingtute tan a rah seng hnua riral awm lo tur leh hlawk zawka sawngbawl dan zir hona (training on post harvest management and processing of mango & pineapple) an buatsaih.

Lawngtlai Press Club-a he training buatsaih hi Lawngtlai Divisional Horticulture Officer Pu C. Lianluaia'n a kaihruai a. Horticulture lama kut hna thawktute thar chhuah chu seng theih a nih a, a hmin hnuah rei tak dah a har thu sawiin, thar chhuah tam mah se, tihral nghal zung zung a nih loh chuan a chhe thuai thin a, kut hna thawktute thar chhuah chu a riral mai mai loh nan a vawn that dan leh sawngbawl zui dan thiam a pawimawh hle a ni, a ti a. Kut hna thawktu thlan bik kal khawmte chu hmathlir thui tak nei a, an training hlawkpui tum ngei turin a chah.

ADHO Pu Hunlawmawma chuan Krishi Vigyan Kendra (KVK) Lawngtlai te nen tang kawpa Horticulture lama kut hna thawktute harsatna hrang hrang chin fel dan tur leh an thar chhuah tihpun nana ruahmanna hrang hrang an siam thu sawiin, rawn phak maia awm Horticulture Department leh KVK-a mi thiamte rawn nachang hria a, an thurawnte ngai pawimawh thiam turin kut hna thawktute chu a chah ve bawk.

Vawiin training-ah hian KVK Lawngtlaia Subject Matter Specialist (Home Science) Pi Vanlalruati leh Horticulture Extension Officer Pi Laldintluangi Ralte te chuan a thu leh a taka entirin kut hna thawktu kal khawmte chu an zirtir a. Theihai leh lakhuihthei hmanga theitui (squash) siam dan, theihai phut (mango amchur powder) leh theihai tlang (mango bar) siam dan, lakhuihthei hmanga thei chhum khang thlum (jam) siam dan leh theihai um thur (mango pickle) siam dan te zir ho a ni a. Chawhnu lamah an thil zirte a takin an ti chhin nghal bawk.