109/2023-2024
Champhai, the 14th April, 2023: Agriculture Minister Pu C.Lalrinsanga chuan vawiin chawhnu khan Hnahlan khua tlawhin Mizoram Sawrkarin Outlook Tech Summit & Swaraj Award for Outstanding in NE State in Agriculture 2022 leh Good Governance Index, Agriculture and Allied Sector in Hill States 2021 a lawmman 1-na a lak lawmpuina hun, Hnahlan VC buatsaih Community Hall-a neih chu Khuallian niin a hmanpui a. He hunah hian Health & Family Welfare Board Vice Chairman Dr. ZR. Thiamsanga, Champhai North bialtu MLA chu khualzahawm a ni.
Khuallian Pu C.Lalrinsanga chuan Hnahlan khawtlangin Mizoram Sawrkarin Outlook Tech Summit & Swaraj Award for Outstanding in NE State in Agriculture 2022 leh Good Governance Index, Agriculture & Allied Sector in Hill States 2021 a lawmman 1-na a lak lawmpuina an buatsaih avangin lawmthu a sawi a. Lawmman dawn chu kan zavaia thawhhona leh inlungrualna avang chauh a neih theih a ni, a ti a. Buh leh thlai chin nana ram cheithat hna land development scheme Lailiphaiah kalpui zel tum a nih thu leh, a zuitu pawimawh tak tuikawngte a tul ang zela ngaihtuah tum a nih thu a sawi a. A theihna apiangah Land Development leh All Weather Road, Rigid Pavement ti tura hmalak tum a nih thu a sawi bawk.

Agriculture Minister chuan leilung tuina leh hannate'n thlai leh thei thar chhuah hmel lan dan leh tui danahte nghawng a neih avangin uluk taka zirchian a pawimawh thu a sawi a. Leilung thlaiin a ei dak tawh tih that leh nan thiamna hmanga leitha siamna kalpui chhoh mek a nih thu sawiin, leitha siamte District tinah enchhinna nei tura tih a nih thu leh result ngaihchan mek a nih thu a sawi a. Buh leh thlai tharchhuah kawnga intodelh thei  tura theihtawp chhuah zel a pawimawh thu sawiin, kan tih theih ve reng buh leh thlai thar chhuah kawngah theihna kan neihte kan chhawr tangkai a tul a ni, a ti a. Agriculture leh product hrang hrangte chawisan nana Co-operative Society kaltlanga hmalaknate, Agriculture Department leh FOCUS kaltlanga hmalaknate a tarlang a. Kalkhawmte chu zonun zemawi nunpui tlat tur leh mahni kutke a ding thei tura taima turte, ram leilung hausakna chhawr tangkai thiam nih tum turtein a chah a ni.

Khualzahawm H&FW Board Vice Chairman Dr. ZR. Thiamsanga chuan Hnahlan khawtlang tana Agriculture Department hmalakna kawnga Minister thahnemngaihna fakawm a tih thu a sawi a. Sawrkarin Grape Wine Rule thar a siam chu Grape chinga eizawngtu tam tak awmna Hnahlan khawtlang tana thu lawmawm tak a nih thu a sawi a. SASCI kaltlangin bial chhunga inkalpawhnate changtlung zawka siam chhoh zel tum a ni, a ti bawk a. Hnahlan khuaa Police Station dah a nih theih nan chak taka hmalak mek a nih thu leh beiseina sang tak neih a nih thu a sawi a. Zirna sang zawk leh changtlung zawk neih a nih theih nana theihtawp chhuah mek zel a nih thu leh, infiamna ruhrel tha zawk chhawpchhuah tuma hmalak zel a nih thu a sawi bawk.


He hun hi Pu Lalremruata Cherput, VCP Hnahlan chuan a kaihhruai a. Pu Lianhmingthanga Hnamte, Joint YMA Vice President-in kalkhawmte lawmna thu a sawi a. Pu K.Lalnunzira, President, Hnahlan Education Staff Association (HESA) in lawmpuina thu a sawi bawk a ni.

Hemi hnu hian Agriculture Department hnuaia Sawrkar hmalaknate enin Hnahlan Lailiphai a tlawh a; hmalak zel dan turte a enfiah a. Agriculture Minister hian vawiin vek khan Ngur leh Vapar khuate pawh tlawhin khawtlang mamawh thlente chu a tul anga lo enzui a tum thu a sawi a ni.

Minister Pu C.Lalrinsanga hi Aizawl atangin Pu Lalrotluanga, Chief Engineer, I&WR Department, Pu K.Hamlet, Sr. E.E, I&WR Department, Pu Lalmalsawma, Jt. Director, Agriculture Department, Pi Lalnunpuii Parte, State Coordinator, Mission Organic Mizoram (MOM) te bakah Champhai atangin Pu James Lalrinchhana DC Champhai, Pu Laldingliana Hrahsel, EE, I&WRD, Pi R.Lalramhluni, DAO Champhai leh Official dangte'n an tawiawm bawk a ni.

Attachment

  • Loading attachment...