110/2023-2024

Tukin zing dar 8:30 khan Agriculture Minister Pu C. Lalrinsanga chuan Ngopa Saphmuahna Mual ah Zaupui Organic Farmers Producer Company te hman tur Pack House a hawng. He Pack House ah hian khawl chi hramg hrang- Aieng, Chhawhchhi, Antam, Hmarcha, Vaimim, Nihawichi leh Sawhthing  herna khawl bun a ni a. Heng khawl te hi MOVCD-NER hnuaia Zaupui Organic FPC ten an lei niin heng khawl te hi Pulvarizer (Her dipna khawl) leh 10 Hp Oil Expeller te an ni.

Hawnna inkhawmah hian Minister Pu C. Lalrinsanga chuan thusawiin Sawrkarin harsatna tam tak karah tha thlah lovin intodelhna kawng a zawh zel a. Chu kawngah chuan MOVCD hnuaia Organic Movement hi theihtawpa kalpui niin Zaupui FPC, Ngopa ten nasa taka tha leh zung chhuaha Organic thlai thar kawnga hma an la chu lawmawm a tih thu a sawi a. Organic movement kan kalpui hian rah ṭha a chhuah mek a,  tunhnai mai ah pawh USA thlengin kan organic hmarcha thar kan hralh thei ta a ni a. Organic thlai hi a hrisel piah lamah a market a ṭha a,  organic farming lama kan hmalakna hi na zawka kalpui turin hmabak thui tak kan la nei a ni, a ti.

Agriculture Minister chuan Ngopa Block Agriculture Office leh Ngopaa Agriculture Department hmunhma te a hmunah a enfiah nghal a ni.

Zaupui Organic FPC hi MOVCD-NER hnuaia din niin farmer 934 an awm a, khaw 18 ah hma la in an thlai pui ber chu hmarcha a ni.

Pack House hawnna hi Pu Lalengzauva Sailo, Zaupui FPC Chairman in a kaihruai a. Agriculture Minister hi Pu Lalmalsawma,Jt Director, Agriculture Department; Pi Lalnunpuii Parte, State Coordinator, Mission Organic Mizoram leh mi pawimawh dang ten an ṭawiawm a ni.