111/2023-2024

Vawiin khan Dinthar YMA Hall, Aizawla program buatsaihah Formasa India Foundation chuan Serchhip leh Aizawl District huamchhunga YMA Branch thenkhat te leh PHC pahnih - Ngentiang leh Chhingchhip hnenah an hlan a. Social Welfare Minister Er.Lalrinawma chu khuallian niin he hun hi a hmanpui a ni.

Minister Er. Lalrinawma chuan mihring nunna chhan nan Oxygen Concentrator hi a pawimawh hle a, to tham tak a nih avangin lei mai te a awlsam lo a, Formosa Foundation ten a mamawhtute tan a thlawna an sem chu lawmawm a tih tak meuh thu a sawi. Hriselna pawimawhzia sawiin Minister chuan ei leh in fimkhur a, mahni taksa tha taka enkawl turin mipuite a chah a. Mizo hnam tlem te zingah mipate an thi nasa em em mai chu a vei thu sawiin, kan nunna pawt tawi thei thil tha lo lakah kan fihlim a ngai tiin zuk leh hmuam, zu leh ruihtheihthil laka insum turin a fuih. Minister Er. Lalrinawma chuan YMA Branch hrang hrang te hnena hlan tak Oxygen Concentrator chu khawtlang mipui a mamawhtute tan malsawmna a nih ngei a beisei thu a sawi a, hman ngai lo tur khawpa hriselna tha nei tur erawh chuan a duhsak thu a sawi bawk a ni.

Oxygen Concentrator dawngtute hi Branch YMA 22 - Darlawng, Tlungvel Field Veng, Tlungvel Venghlun, Tlungvel Gate Veng, Phulmawi, Khumtung, Baktawng Joint YMA, Chhuanthar, Chhingchhip, Chhiahtlang Hmar Veng, Chhiahtlang Kawn Veng, Sialhau, Thentlang, Khawbel, Lungpho, Rullam, Ngentiang, Thinglian, Hmuntha, Hualtu, Bukpui, Mualpui te an ni.

Programme hi Formosa Foundation India Coordinator Pu Vanlalruata Ralte chuan a kaihruai a. Formosa Foundation India Chairman Pu Jonathan Lalremruata chuan an pawl din tan dan leh COVID19 vanglai atanga vawiin thlenga khawtlang mipui rawngbawl hna an thawh chhoh dan a sawi a. Pu SF David Ngursangzela, PS to Minister chuan lawmthu sawiin hun hnung a khar a ni.