112/2023-2024
Aizawl, 15.04.2023: Chief Minister Pu Zoramthanga chuan vawiin khan Bru Boisu Wai 2-na chu Cultural Centre-cum-Auditorium, Vaivakawn-ah khuallian niin a hmanpui.
Chief Minister chuan Bru hnam tan a hun pawimawh tak a telpui thei chu lawmawm tiin, hun hlawkthlak tak an hman duhsakna a hlan a. Mizoram chu state lian lo te, hmasawnna hnathawhna tur sum pawh state lian zawkte nen khaikhin chuan a tam tawklo viau thu leh, chutihrual chuan sawrkar laipui ah project siamin hmasawnna hna thawhna tur haichhuah tur tam tak a awm thu a sawi a. Minority community te chhawmdawl a chawisan chu sawrkar laipui pawhin a ngaihpawimawh thu sawiin, Bru community te pawhin an hmasawnna tur mamawh an neih angte chu project siamin sawrkar laipuiah a kaihhnawih department te kaltlangin bawhzui a nih tur thu a sawi. Chief Minister chuan Mizorama Bru zirlaite awmna tur hostel sakna tur an dil chu sawrkarin a ngaihtuahpui tur thu a sawi bawk. Hmasawnna hna thawh piah lamah culture lama hmasawnna chungchang pawh sawi telin khuallian chuan mahni culture te chhawmnun zel a pawimawhna te sawiin, inlungrual taka awmho a pawimawh thu a sawi bawk.
He programme ah hian hnam lam leh zai hrang hrang te entir a ni a. Organizing Committee Chairman Pu M. Malsawmthanga chuan kalkhawmte lawmna thu a sawi a, BWUI President Pu Biakthuama Molshoy, BWUI Advisor Pu Zonunmawia leh Pu US Lalhmingliana tr hnen atangin thusawi ngaihthlak a ni bawk.
