113/2023-2024
Champhai, the 15th April, 2023: Vawiin khan Large Size Agriculture Multipurpose Co-operative Society (LAMPS) Ltd. Champhai chuan Annual General Assembly-2023 Kahrawt Community Hall-ah an hmang a, he hun hi Champhai District Bawrhsap Pu James Lalrinchhana chuan khuallian niin a hmanpui a, Pu B.Lalchhandama, District Co-operative Officer (DCO) Champhai chu khualzahawm a ni.
Khuallian Pu James Lalrinchhana chuan hun tha tak hnuaia LAMPS Champhai Annual General Assembly neih a ni chu lawmawm a tih thu a sawi a. Tun thlenga lungrual taka an thawhho theih nana hruaitute leh member tinte inpekna fakawm a ti a, shareholder 279 an tling thei chu inlungrualna tha tak vang a ni, a ti a. An pawl hmalakna hrang hrangte chu a lawmpui thu sawiin, hmalakna pangngai bakah faina kawnga multi-purpose co-operative society-te chhuanawm a tih thu a sawi bawk a. Kalkhawmte chu khawtlang leh ram sum leh pai dinhmun chawisan kawnga tangrual zel turin a chah a ni.
Champhai District Bawrhsap chuan ram pawn atanga thil lakluh titlem tur leh mahni intodelh thei tura tanlak a pawimawh thu sawiin, keimahni ngeiin kan nitin mamawh kan thar chhuah theih chuan a hlawkna pawh kan têl thei dawn a ni, a ti a. Champhai District chhunga buh leh bal leh sa a intodelh a nih theih nana hmalak dante tarlangin, co-operative society than zel nan keimahni theuh kan pawimawh a, inlungrualna nen kan tanho zel chuan hma nasa takin kan sawn thei dawn a ni, a ti. Champhai District-in khualzinte hip theitu pipu sulhnu leh hmun nuam tak tak kan nei a, hengte hi khualhip nana hmang tangkai turin kan tanrual a ngai a ni, a ti a. Annual General Assembly chu member-te ti phurtu leh tanlak tirtu nise a duh thu sawiin, inlungrualna leh phurna nena kalzel tura chahin duhsakna a hlan a ni.
Khualzahawm Pu B.Lalchhanhima, District Co-operative Officer, Champhai chuan Champhai LAMPS in hniam lam pan lova hmasawnna lam a pan zel chu lawmawm a tih thu a sawi a. AIF atanga hmalakna thar tha tak tak an nei tur chu lawmawm a tih thu sawiin, hruaitu tha tak takte awm mahse a neitu tak takte chu shareholder-te an ni a, society kal zelna turah hruaitute kutah engkim dah mai lova, co-operative nih angin harsatna neihte inpuitawn a, tanlak tlan angai a ni, a ti a. Member tinte chu society hmasawn nana rilru leh ngaihtuahna zawng zawng seng tur leh, mawhphurhnate hrechiang turin a chah bawk a. Sawrkar laipuiin PACS a ngai pawimawh a, an tan ruahmanna tha tak tak a ngaihtuah mek a ni, a ti bawk.
He hunah hian Dr. B.Lallawmsanga, District A.H& Vety. Officer, Champhai leh Pu H.Lalzova, Managing Committee, Champhai LAMPS te hnen atangin thusawi ngaihthlak a ni bawk.
He hun hi Pu JC Chawngvawra, Chairman, Champhai LAMPS chuan kaihruaiin Upa F.Lalrinawma'n hunserh a hmang a. Pu C.Ralkapzauva, Secretary, Champhai LAMPS in inhmelhriattirna neiin member thite sunna hun hman a ni a. Nl. Lalbiakchhungi, Manager, Champhai LAMPS chuan report a pe a ni.
Chawhnu lamah rorel inkhawm neih niin, DCO Champhai kaihhruaina hnuaiah an pawl hruaitu tur an thlang a. Pu C.Lalrizapa, Vice Chairman, Champhai LAMPS chuan lawmthu sawiin Annual General Assembly a khar a ni.
Attachment
- Loading attachment...
