No.3181/2021-2022

Aizawl 27th November 2021: Nimin khan Agriculture Minister Pu C. Lalrinsanga chuan Aijal Club-ah FOCUS Mizoram Project kalpui dan endiktu UN peng pakhat International Fund for Agriculture Development ( IFAD) team te chu cultural programme a hmanpui.

Mizoramin FOCUS project a kalpui mek dan te en thlithlai a, rawtna leh kaihhruaina te pe turin IFAD mithiam Pu Anton Glaser, Mission Leader leh a hoten tunlai hian FOCUS project in a huam- Champhai, Kolasib, Serchhip, Mamit, Saitual leh Khawzawl District ah te Mid-Term Evaluation an rawn ti mek a. FOCUS Mizoram chuan mithiamte hi lo dawngsawngin nimin tlai khan Agriculture Minister Pu C.Lalrinsanga hovin Cultural Programme hi hman a ni a.

He hunah hian Agriculture Minister chuan thu sawiin Agriculture leh a kaihhnawih kawng hrang hranga Mizoram mamawh te phuhru tura nasa zawka hma lakpui turin IFAD mithiamte chu a sawm a. Minister chuan Mizoram hmalam thlirin kan tlangram duat tak chunga kan economy tih that theihna tur te, sik leh sa inthlak danglam chak tak avanga kan ram enkawl dan mumal zawk neih dan tur leh kan loneitute tan a hlawk zawka farming kalpui a nih theih nan Integrated 3-Tier farming System kan mamawh thu te IFAD mithiamte hnenah hian a thlen a. Mizoram Sawrkar chu IFAD tana a inhawn thu leh heng kan mamawhte tihhlawhtlin a nih theih nana chak lehzuala thawpui turin IFAD mithiamte chu a sawm a ni. Minister chuan IFAD mithiamten Mid-Term Evaluation an rawn neih chhunga an rawtna siamte chu a taka kalpui a nih ngei theih nan FOCUS Mizoram hmalakna chu uluk lehzuala a lo enpui zel tur thu IFAD hotute hnenah hian a sawi bawk.

Fostering Climate Resilient Upland Farming System —FOCUS Project ti a sawi — hi United Nations hnuaiah IFAD leh Mizoram sawrkar in kum 2018 January Ni 25 khan agreement ziaka kalpui tan a ni a. FOCUS Project hi USD Maktaduai 79.30 ( $79.30 Million) senna tur project niin he project in a tum chu tlangram lo neituten sik leh sa inthlak zel mila agriculture leh a kaihhnawiha hmalakna an kalpui theih nana kaihhruaina leh an mamawh pek a ni a. FOCUS project hmang hian loneitute chu Farmer Interest Group (FIG) hrang hranga kuahkhawm niin, tlangram lo neih dan tha zawk zirtir te, thlai kumhlun chin dan mumal zirtir leh chin tur pek te, ran vulh dan awmze neia kalpui te leh kawng hrang hranga kuhthnathawktute kaihhruai leh an mamawh te pe a hmalakna kalpui a ni a. Environment chhe zel tur laka invenna mumal tak siama loneitute leh kuhnathawktute mamawh kawng hrang hranga phuhruk sakna Project pawimawh tak a ni.