No.3180/2021-2022

Aizawl, the 27th November, 2021: Social Welfare Minister Dr. K. Beichhua chuan vawiin khan a bial fan chhunzawm lehin, Thiahra, Amotlah, Riasika leh Tipi Ferry khua te a tlawh.

Siaha bialtu MLA, Dr. K.Beichhua chuan khaw hrang hrang a tlawhnaah thu sawiin, Mizoramin hun harsa kan tawh mek karah Zorama rorel turin Pathianin BJP, Congress leh ZPM te a ruat lova, an fel vang leh that vang ni lovin Chief Minister Pu Zoramthanga kaihhruai sorkar hi tun dinhmunah chuan Pathianin a ruat a ni, a ti.

Dr. Beichhua chuan vawiinah bial a tlawhnaah a thu ken ber chu ram mipui rilru siamthat a ni, a tiin, kan rilru puthmang a dik loh chuan hmasawnna hi khawiah mah a lut dawn lo a ti a, politician te pawhin tlak ngamin politics kan khelh a hun tawh a ni, a ti.

"Thil eng emaw tihsak tur che u in ka rawn kal lova, rilru dik pu a, keimahni theuh intodelh tura kan thawhrim a hun tawh takzet tih thupui kengin ka rawn kal a ni, hnam hnufual leh a hnuaihnung reng tura duan kan ni bik lova, kan thawhrim phawt chuan a hnuaihnung ber kan ni bik reng lovang, tiin a sawi.

Thuawih leh tihnuam takin awm ula in rama thilthate in ei ang, tiin kan Pathian thu in min hrilh a, thuawih lo thenkhat avangin kan vawk vulh ngei pawh kan ei thei tawh lova, a pawi hle a ni. Vawksaah intodelh tumin sorkarin theihtawp a chhuah a, rampawn atangin vawk lakluh a khap a, kum 2 velah chuan intodelh theih kan beisei laiin, sorkar thuawih lo mi thenkhatin rampawn atangin a rukin an lalut a, vawk pul hri, African Swine Fever an tidarh ta a ni, a ti.

Minister of State Dr.K. Beichhua chuan SEDP kaltlanga Sericulture department in Pangang khawi tanpuina an pekchhuah atanga loneitu thenkhat hmalaknate official te nen an en nghal bawk.

SEDP hnuaiah Line Department, Sericulture Department chuan Thiahra khuaah Pangang khawi tanpuina chhungkaw 30 hnenah a pe a, Amotlah khuaah chhungkaw 33 hnenah an pe bakah Riasika khuaah chhungkaw 7 tanpuina an pe bawk a ni.

Dr K. Beichhua hi CDPO Siaha in tawiawm nghalin, khua an tlawhnaa Anganwadi Centre te dinhmun an enfiah nghal bawk.

Minister hi MADC-a MNF Legislature Party leader, Pu HC Lalmalsawma Zasai, MDC, Pu HC. Biakcheuva, Official dangte leh Party miten an tawiawm.