No.3179/2021-2022

Aizawl the 27th November, 2021 : Nimin 26th November, 2021 khan Assam sorkar leh The Hindu chanchinbu buatsaih NE Sports Conclave, Radisson Blu Hotel Guwahati-a neihah Sports Minister Pu Robert Romawia Royte chu tel ve in thusawitu zinga pakhat a ni.
     
Conclave ah hian Pu Robert Romawia chuan Mizoramin astroturf football ground 10 a neihsa bakah a thar 24 neih belh thuai a nih tur thu  a sawi a. Hengte hi kawng hrang hranga sum zawn khawm atanga neih tur a ni, a ti a. State thenkhatah stadium ruak a tam thu sawiin Pu Roberta chuan heng stadium te hi an hmang tangkai tawk lo a ni thei a ti a. Mizoramah erawh chuan hman theih hun tur innghah ngai khawpin stadium indaihlohna a la nasa a ni, a ti.
       
Pu Robert Romawia chuan Govt of India-a thuneituten kum 2018 atanga DoNER hnuaia NESIDS leh NEC scheme te tidanglama sports hmasawnna ruhrel siamna tur lam a titawp hi a fuh lovin hemi chungchang ah hian NE State hrang hrangte ṭangruala beih tlan a ngai, a ti a. Sports hmasawnna tura NE bualin sum a hmuh ṭhin a tawp chu a uiawm takzet a ni, a ti.
       
Minister chuan National Education Policy 2020-in sports a ngaih pawimawh thu pawh sawiin tun hmaa Co-curricular activity ni ṭhin kha tunah chuan curriculum-ah a awm tawh dâwn avangin sports hi India ramah a lian tawlh tawlh dâwn a, hemi atan hian inbuatsaih țhat a ngai dawn tih a sawi.
       
Pu Robert Romawia Royte chuan Football lam background nei a nih avangin mi thenkhat chuan Football hmasawnna atan chiaha thawk turin an ngai mai thei tih a sawi a. Sports discipline zawng zawng atan theihtawp a chhuah tih Mizoram mipuiin an hriatpui tih a tarlang a. Boxing lamah nasa taka hma lak a niin international boxer pawh Mizoramin a nei nual tawh a, professional boxing pawh kalpui tum a ni tih a sawi a. Boxing hmanga Mizoram leh Las Vegas thlun zawm theih hun a nghahhlelh thu a sawi a. Badminton, hockey, weightlifting leh individual sports lamahte pawh hma lak a nih dan tarlangin hockey khelhna tur hmunhma pawh siam a ni dâwn a, sports discipline dangah pawh hma lak zel a nih thu a sawi.
     
Nimin tlai vek khan Sports Minister hian Guwahati Mizo Welfare Association buatsaih, ni hnih awh tur Sports chu Mizoram House Complex Guwahati-ah a hawng a, Guwahati-a Mizo țhalai rualte hmaah thu sawiin, Mizoram sorkarin State pawna Mizo awmte a ngai pawimawhin an Sports neih tur chu taksa hriselna atana pawimawh piah lamah Mizote inhmuh khawmna leh inhriat pawhna atan a pawimawh a ni a ti a. Hlim taka hmang tura duhsakna hlanin an senso phuhruk nan Rs 1,00,000/- a pe a ni.