Vawiin chawhnu khan Agriculture lama thiam thil zirna  Integrated Training Centre (ITC), Hnahthiala Basic Agriculture Training zirlai batch 30-na zirlai pass chhuakte pual in Passing Out Ceremony, KVK Auditorium, Hnahthialah hun hman niin he hun hi Pu C. Lalrinsanga, Minister Agriculture Department etc. chu khuallian a ni.

Inkhawm Pu James Vanlalluaia kaihhruaiah  thu sawiin Pu C. Lalrinsanga  chuan Integrated Training Centre (ITC) a Basic Agriculture Training zir chhuak zirlai 18-te chu a lawmpui thu sawiin hnam leh khawtlang hmasawnna tura an thiamna te hmang tangkai turin a fuih a. ITC-a zirtirtu instructor-te chu chhuanawm a tih thu sawiin midangte hnena thiamna tha tak pe chhuak tu leh chung thiamna an pek te chuan grassroot level-a kuthnathawktute hnenah thiamna an hlan chhawng ve zel a ni, a ti a. Minister chuan ITC atanga zir chhuakte chu an thiamna leh theihna te mi dangte tana hmang chhuak tur leh rinawmna nen kal tlat turin a chah a ni.  ITC ti hmasawn zel tura theih tawp chhuaha hmalak a nih mek thu sawiin Agriculture Science zirna hmunpui, diploma course zir theihna ni tura ruahmanna a kal mek thu a sawi a ni. A sawi zel naah Minister chuan Agriculture Department hnuaia hnathawkte thawhrimna leh inpekna chu fakawm a tih thu sawiin tun hnai maia Fallarmy worm an buaipui kawngah pawh tanpuina hna an thawk tha takzet a ni, a ti a.Agriculture Department hnuaia Crop Husbandry leh Research & Extention (R&E) an awm chu tha a tih thu sawiin a bik takin R&E hi kuthnathawktute hnena thiamna petu leh malsawmna thlentu pawimawh tak an ni a ti. Ei leh bara kan intodelh loh chuan ram dang mite kutah kan innghat reng dawn a ni tiin Minister chuan kan rama kan tharchhuah ngei hmanga intodelh turin hma kan la dawn a ni, a ti bawk.

Agriculture Minister hi Dr. Saithantluanga, Director of Agriculture (R&E), Pu Lalrotluanga, Chief Engineer, Irrigation & Water Resources Department, Pu C. Khamluaia, SDO (C) Hnahthial Pu Tlangtimawia Zote, DAO Lunglei, Pi C. Lalremruati, DIPRO Lunglei bakah Agriculture Department-a Officer te leh party hruaitu ten an tawiawm a ni.

Integrated Training Centre (ITC), Hnahthial hi 4th April, 1981 ah hawn niin tun dinhmunah zirlai 810 an pass chhuak tawh a ni. Vawiin ICT zirchhuakte hi zirlai 18 niin kum 2 chhung semester 4 ah Soil Science, Agronomy, Horticulture, Soil Science, Plant Protection leh general Assessment an zir a. Classroom chhunga inzirtirna piah lamah practical nasa taka neiin thlai hrang hrang te an ching a ni.  Distinction ah mi 2, 1st Divion ah mi 5 leh 2nd Division ah mi 11 an pass chhuak a. Khuallian hian zirlaite hnenah certificate hlanin Top 3 hnenah citation a hlan bawk. Top 3 te chu:

1na - K Lalrinchhana, Bukpui
2na - Christy Lalnunsiami, Keitum
3na - Zarzokimi, Aibawk