Pu Robert Romawia Royte Sports Minister chuan Mizoram sports hmasawnna atana kumtir lama Mizoram Sorkarin Rawtna (DPRs) a submit tawhte bawhzuiin nizan khan Union Youth Affairs & Sports Minister thar Kiren Rijiju chu a chenna Inah a kawm a,Mizoramin Projects a thehluh tawhte sanction rang turin a ngen.
Vawiin ni khan Union Sports Secretary RS Julaniya pawh kawm lehin Mizoram Sports Deptt in tunhnaia Projects 6 a thehluh tawhte chu sanction rang turin a ngen a,NEC sum hmanga siam tura ruahman Saitual leh Hnahthial Football Ground te kum 2018 atanga tihtawp tak chu Ministry of Youth Affairs & Sports in Technicall Vetting ti tharin tharthawh leh vat a tul thu a hrilh bawk. Pu Roberta hian Union Sports Secretary chu kumtir lama a ngenna anga Kolosib Saidan hmun SAI Centre dinna tur Union Sports Ministry in a tifel chu lawmawm a tih thu hrilhin Saidan Field a Phullem phah hna pawh SAI in an thawh tan mek thu a hrilh bawk.
Union Sports Secretary chuan Mizoram tan Football Field 2 a Phullem phahna tur leh Hockey Ground 1 a Phullem phahna tur sum sanction chu ni 30 chhunga tihfel hman a inbeisei thu Sports Minister Pu Roberta a chu a hrilh a ni. Minister nen hian Mizoramah Sports thei fal bikte enkawlna district hrang hrangah changtlung tak taka discipline hrang hrang tan siam dan turte an sawi dun a,Olympic Medal la pha tura training na hmun tha leh Coach tha rawih dan turte sawidunin Minister chuan DPRs an siam vat tur thu a hrilh a ni.
Tourism Minister ni bawk Pu Romawia Royte hian Union Tourism Minister thar Prahlad Singh Patel pawh Parliament House-a a pisaah kawmin Thenzawla Golf Course sak zawh thar chu hawng turin a sawm a,Union Minister hian a thuphungin a pawm a ni.
Pu Robert Romawia ngenna angin nikum 2018 a tawpsan tawh Chaltlang to Durtlanga Ropeway project pawh tihnun thar leh a hmun tha zawka sawn pawh a lo enchian tur thu Union Tourism Minister hian a lo hrilh a ni. Pu Roytea’n Mizoram Tourism in DPRs Union Tourism Ministry-a an submit tawh te sanction rang tura a ngenna pawh Officials te lo enpui vat a tum thu a lo hrilh bawk.
Pu Robert Romawia Royte hian Ministry of DoNER Secretary Inderjit Singh-a pawh kawmin Reiek Tourism Project a sawipui a, DoNER Secy hian Rs 560/- lakhs chu sanction turin a thuphungin alo pawmpui nghal a, Mizoram Tourism Project lian zawk dangte pawh lo enzui an tum thu alo hrilh bawk. Kumtir lama Pu Roberta’n DoNER Ministry leh NEC in 2018 atanga Sports lam kaihhnawih atana sum pek khapna dan a siam alo sawisel tawhnate chu dik a tih thu leh Mizoram Sports Minister chu a tan tlat thu lo hrilhin hma pawh lak nghal tawh a ni a, NEC leh DoNER Ministry in sports hmasawnna atana sum an hman theih hun hi alo thlen leh thuai a beiseiawm thu Mizoram Sports Minister hi DoNER Secy Inderjit Singh chuan alo hrilh a ni.
Tourism Minister hi Pu Ajay Choudhury IPS,Mizoram Resident Commissioner in a tawiawm a ni.
Minister Pu Robert Romawia Royte hian nimin lamah Assembly Speaker Pu Lalrinliana Sailo Kolkotta AMRI Hospitala awm mek pawh a tlawha, tukin zing khan Dy CM Pu Tawnluia pawh New Delhi-ah a tlawh bawk a. Pu Roberta chuan Dy CM Pu Tawnluia leh Speaker Pu Rinliana te chuan hma an sawn chak ve ve a ni a ti. Minister hi mi pawimawh dawrin Delhi ala cham zui dawn a ni
