Vawiin tlai khan Irrigation & Water Resources, Agriculture leh Cooperation changtu Minister Pu C. Lalrinsanga chuan Japan International Cooperation Agency (JICA) team, Japan atanga lo kal te chu a chenna Bangalow ah thingpui inpuiin Mizorama JICA Project kalpui dan leh hmalakna kalpui zel dan tur a sawi pui.

JICA leh Mizoram sawrkar thawhhona hi technical project cooperation sector ah niin, a project hi “ The project on Capacity Enhancement for Sustainable Agriculture and Irrigation Development in Mizoram” tih a ni a. Department pali- Irrigation & Water Resources, Agriculture, Horticulture leh Land Resources Soil and Water Conservation Department ten JICA project hi an kalpui a ni.

JICA Project hnuaiah hian Pilot Village pali ah Minor Irrigation Project pali, Rs. 192.90 lakh senga thawh mek a ni a. Contract Work 35% leh Community Contract 80% thawh zawh tawh a ni.

Mizorama hmalakna tur RD Block Pali- Bilkhawthlir (Kolasib District), Aibawk (Aizawl District), Serchhip leh Champhai te thlan an ni a. Tunah hian Kum 2020-21- a tan tur 2nd Pilot Project atana inbuatsaih leh mek niin, khaw pathum Bilkhawthlir N, Lamchhip leh Tlangsam te chu Pilot village atan thlan an ni.

JICA project hnuaiah hian loneituten awmze nei zawk leh changtlung zawka hma an lak theih nan Japan thiamna hmanga enkawlna kawng hrang hrangah an dawng thin a. Project mithiamten englai pawhin loneitute hi vilin, training, meeting, workshop te leh filed visit te neihpuiin Annual Activity Plan te siam a ni a. Heng activity hrang hrang atang mithiamten an hmuh chhuah mil zel hian Agriculture leh Irrigation lama hmalakn ahmachhawp duan a ni thin.

He inkawmhona ah hian Minister Pu C. Lalrinsanga chuan chaw-a Mizoram a intodelh theih nana a mamawh em em mai chu thiamna (Technology) lama hmasawnna hi a ni a. A rahbi ber chher rem a nih chuan sum tam tak seng lo pawhin hma a sawn theih a, chumi atana Japan mithiamte nena thawhhona duhawm tak neih theih ani dawn chu lawmawm a ti a. Thawhhona tha leh inpekna dik neih chhawm zel a pawimawh a ni a ti bawk a ni. Minister chuan Mizorama nitin ei leh bar mamawh hrang hrang lei nana sum tam tak ramdanga thehchhuak tawh lova, keimahni thar ngei kan ei theihna atan Japan mithiamte nena tanhona hian rah tha tak a chhuah zel ang, tiin a sawi.

Japan atanga lo kal JICA hotute hi Pu Narihide Nagayo, Senior Technical Advisor, Pu Ryohei Chiyojima, Programme officer leh Pu Yamaoka, Chief Advisor, Mizoram team te an ni a. Minister hi Er Lalrotluanga, C.E, Irrigation & Water Resources Deppt leh officer dang ten an tawiawm bawk a ni.