Vawiin khan Pu C.Lalrinsanga, Agriculture, Irrigation & Water Resources etc changtu Minister chuan Khawzawl District chhunga khaw hrang hrang Khawzawl, Khawhai,  Sialhawk leh Chawngtlai a tlawh a, khawtlang hruaitute  inkawmhona hun a neih pui a, loneituten an mamawh hrang hrang an lo thlen te ngaihthlak sakin, heng an dilna te hi a tul ang zela a ngaihtuahpui tur thu a sawi a ni.

Amah lo hmuaktu Khawtlang hruaitute hmaah Minister Pu C.Lalrinsanga chuan Kuthnathawktute tan SEDP kal tlangin chak taka hmalak  tum a nih thu a sawi a, hemi atan hian Sorkarin Agriculture Devolopment Board pawh a din fel tawh a, Buh leh bal a intodelh chu an tum bulpui ber pakhat a nihthu a sawi a  Kuthnathawktute harsatna tawh thinte chhawk zangkhai turin Farmers Crop Insurance kalpui tan a nih dawn thu sawiin, a bultan nan thlai thlan chhuah bik thenkhatah kalpui phawt a ni ang a ti.

Minister chuan Sorkar tharin Kuthnathawktute tan pension scheme kalpui a tum thu sawiin,  kum 18 leh kum 40 inkarte tan a ruahman rih phawt a nih dawn thu a sawi a. A chhawrtu an tam theihna turin kum bithliah pawh hei aia huapzau deuh a kum 50 ral kai tawhte pawhin an chhawr ve theih dan tur kawng zawn leh tum a nih thu a sawi bawk. Farmers' Pension Scheme atan hian loneitu ten pawisa (premium) thla tin Rs 55 atanga 200 inkar pek a ngai a dawn a, kum 60 an tlin thleng  an pek chuan kum 60 an tlin hnuah thla tin Rs 3000 an dawng thei dawn a ni a ti.

Agriculture Minister Pu C. Lalrinsangaa chuan ram changkang zelah Chemical Fertilizer hmanga thlai tharte thinhrikna a lian chho zel a, chumi thlakna tur chuan Bio-fertilizer leitha kan thlaichin ten a ngaih em em tur heti lama mithiam bikte nen siamchhuah hna kan thawk dawn a, hemi tana hmalakna tur hian Sorkarin Rs vaibelchhe 1.7 a ruahman tawh a ni a ti a, kuthnathawktu ten leitha taksa tan pawha hlauhawmloh tur an hman theih tur kan siamchhuak dawn a ni a ti.

Vawiin vek khan Minister hian Khawzawl Sub Divisional Agriculture Office chu a tlawh a.He hunah hian Khawzawl DC Pu H.Lianzela, DAO Pu George Lalthanngura bakah SDAO Pu Lalchharliana leh thawktu dang ten an lo dawngsawng a ni.

Agriculture Minister Pu C.Lalrinsanga hi Er Lalrotluanga, CE Irrigation & Water Resources Department leh Pu James Lalsiamliana Joint Director Agriculture Department ten an tawiawm a ni.

Attachment

  • Loading attachment...