No.1218/2021-2022 

Lunglei the 2nd July, 2021 – Zan hnih riaka Lunglei District rawn zin Agriculture Minister Pu C. Lalrinsanga chuan niminah a Department chan Agriculture leh I&WR-te hmalakna enpuia, a bial chhung VLTF-te a tlawh hnuin vawiin chawhma khan Lunglei Civil Hospital a tlawh.

He hunah hian Lunglei HPC Vice Chairman Pu Lawmawma Tochhawng, Lunglei DC Pu Kulothungan A, Lunglei PWD Building Division EE Er Zirsangliana, Medical Superintendent Dr SR Ngurchamliana leh official dangte an tel a ni.

Minister hian Lunglei Civil Hospital Truenat Laboratory tlawhin an test kalpui dan tlangpui leh Truenat khawl dinhmunte thawktute sawipuiin, mamawh an neihte sawrkarah thlen vat thin turin a chah a ni. Tun dinhmunah Lunglei Civil Hospital Truenat Laboratory-ah Truelab Quattro khawl pali (4) a awm mek a. 14th June, 2021 khan Pu C. Lalrinsanga leh Pu Lawmawma Tochhawng ten an MLA Fund atangin Molbio Truelab Quattro khawl pakhat ve ve Lunglei Civil Hospital-ah hian an donate a ni. Lunglei District-ah June 2021 chhung khan TrueNAT Test 2458 neih niin Covid-19 positive mi 120 hmuhchhuah an ni a, RAgT test 5064 atangin Covid-19 positive mi 363 hmuhchhuah awmin ZMC Laboratory-a sample test tur 490 thawn phei atangin Covid-19 positive mi 19 hmuhchhuah an ni.

Minister leh amah zuitute hian June ni 17, 2021-a bultan Lunglei Civil Hospital Compound-a Laboratory Building sak hna kal mek chu a hmunah an enfiah nghal a. Laboratory Building/Block hi Lunglei Civil Hospital-a Trauma Centre sak mek bul chiah H&FW Department staff quarter hlui awmnaah sak tum a ni. Laboratory Building ruahman mek hi a dung zawng 30.8 metres tur niin a vang zawngin a zau lai berah 13.65 metres tur a ni.

Lunglei Civil Hospital Conference Hall-a thutkhawmna neihah Pu C. Lalrinsanga chuan Covid-19 hri dona kawnga mawhphurtute, a bik takin H&FW thawktute leh VLTF-te thawhrimna leh inpekna chu ropui a tih thu sawiin an chungah lawmthu a sawi a. Lunglei Civil Hospital Compound-ah Laboratory changtlung tak, Mizoram mipuite tana ro tling tur sak hna kalpui mek chu tluang tak leh harsatna awm lova peih fel thuai anih theih a beisei thu a sawi bawk.

Vawiin vek khan Agriculture Minister Pu C. Lalrinsanga, Lunglei HPC Vice Chairman Pu Lawmawma Tochhawng leh Bamboo Development Board Vice Chairman Dr K. Pachhunga te nen Lunglei Circuit House ah Lunglei MJA ten ne inkawmhona hun an hmang. Minister chuan a Department chan pathum hnuaia hmalakna hrang hrang kal mekte kalkhawmte hrilhin Mizoram ah Agriculture lama harhtharna a thleng mek a ni tiin sawrkar laipui, NABARD, IFAD, United Nations Food and Agriculture Organization (FAO) etc te kaltlangin Mizoram hmung hrang hrangah Agriculture kaihhnawih hmalakna lian tham tak tak kalpui mek a ni a. Farmer Producer Organisations 10,000 din tura hmalak mek niin Bio Fertilizer Unit Sihphir Neihbawiha kalpui mek chu Mizoram hmun dangah te pawh kalpui tum a ni a, Kuthnathawktu ten thlai chi tha leh duhtawk an hmuh theih nan thlai chi tih punna leh dah thatna Seed Bank leh Seed Village te pawh kalpui zel tum niin heng hmalaknate hi sawrkar kutah chauh nilovin mahni kutkawiha eizawnna kawng dap thiam entrepreneur-te nena tangkawpa hmalak zel tum anih thu a sawi a. I&WR hnuaia Southern Data Centre tur Lunglei Chanmari-a sak mek chu National Hydrology Project hnuaia kalpui niin kan lui leh tuihna dinhmunte zirchianna kawnga hmanraw pawimawh tak ala ni chho zel dawn a ni, a ti a. Cooperation Department hnuaiah pawh Tribal ten an chhehvel a ramngaw hausakna awmze nei zawka an hman tangkai theihna tura Sawrkar laipui hmalakna Van Dhan Mission chu kalpui mek zel anih thu a sawi bawk.

Vawiin khan Agriculture minister hian a bial chhunga VLTF paruk – Hauruang, Sazaikawn, Venglai, Bazar Veng, College Veng leh Venghlun te pawh tlawhin Covid-19 dona hmanrua hrang hrang te a hlan a ni. Minister hian naktuk lamah a bial fang chhunzawmin khaw pasarih VLTF-te tlawh a tum a ni.