No.1219/2021-2022

Kolasib dated 2nd July 2021: Vawiin chawhnu khan Dr.H.Lalthlangliana, Deputy Commissioner, Kolasib district chuan Covid-19 hrileng do nana Sawrkarin inkaihhruaina thar a tihchhuah chungchang leh ramria hmalakna chungchangah Kolasib district chanchinbumite a kawm a, Dr.Hmingthanzuala, District Information & Public Relations Officer-in a telpui a ni.

Deputy Commissioner, Kolasib chuan July ni 15 thleng a hman tur inkaihhruaina tharah zing leh tlai tawngtai inkhawm neih phal a nih tawh thu a sawi a, ngun tak a Kolasib district chhung hrikai dan dinhmun zir a nih hnuin infiamna hmun, indoor leh outdoor-te chu la hawn rih loh tur a nih thu a sawi. Vairengteah 4C din tur a hmalaknaa kal mek thu sawiin Dr.H.Lalthlangliana chuan VLTF-te hriatpuina leh rem tihpuinain Covid-19 hri kai, natna langchhuak lo te chu in lam a khunghran, Home Isolation kalpui tum a nih thu a sawi.

Kolasib district chhunga hri inkai darh dan en hian in lam a Home Quarantine lai an thathnem thu leh mahni inringhlel a in-test tir atanga hri kai hmuhchhuah an tam thu DC chuan a tarlang a, khawtlang ah hri hi a leng tawh tih hriat a nih avangin hri darh zel tur veng tur chuan VLTF-te an pawimawh hle a ni tih a sawi bawk. Mipui himna atan Covid-19 vaccine chu CMO hmalaknain Kolasib district-ah chak tak a kalpui mek a nih thu DC chuan sawiin Vaccine lak chak lehzual a kalpui a nih theih nan tehfung hrang hrang siamin vaccine lak kawnga titha zual khaw 3-te tan lawmman buatsaih a nih thu a sawi.

Hrileng kan hlauh luatna avangin dam duh vanga Damdawi in pantu dam lote chungah harsatna a thlen phah theih dan Dr.H.Lalthlangliana hian sawiin dam lo na zual tak takte chu rang tak a enkawl zung zung an nih theih nan ruahmanna felfai tak siam a ngaih thu a sawi a, Covid-19 vei leh vei loh endikna avanga nunna chhanhim hna thawktute tihkhawtlaina thleng lo se a duh thu a sawi bawk a ni.

Vairengtea hmalak dan thenkhat tarlangin Kolasib DC chuan Hailakandi DC nen inbiakna an neih reng thu a sawi a, an inbiakna angin sipai duty pawh dah a nih thu a sawi. Thutharlakhawmtute zawhna chhangin Dr.H.Lalthlangliana chuan Mizoram police duty-na hmun 2 te chu Assam Police hian an thiah ngei thu a sawi a, amaherawh chu heng duty post 2-te hi district 2 DC-ten duty-na tur a an ruahmanna hmun a nih loh thu leh Duty-na tur a an tihna hmun ah chuan tanhmun nghet taka khuarin an la duty reng thu a sawi.

Dr.H.Lalthlangliana chuan Duty post thiah a nih chungchangah hian Hailakandi DC chu be nghalin hetianga chetna a awm leh a nih chuan khauh tak a chhan let a nih tur thu a hrilh a. District 2 DC-te inbiakna atanga duty-na tur hmun ruahman atang hian Mizoram Police-te hi pen khat pawh a an la tawlh let loh thu a sawi bawk a ni.

Sawrkar hmalakna tithuanawp thei zawng a khawtlang leh tlawmngai pawl hrang hrangte ramri chungchangah hian kal fawr bik awm lova sawrkar thu ngaichang thiam turin DC chuan mipuite a ngen a, kan Police duty-te dinhmun tiderthawng thei thil Social media kaltlanga theh darh lo turin a chah bawk a ni.