No.1220/2021-2022

Dated Champhai, the 2nd July, 2021: Law & Judicial, Parliamentary Affairs, Transport leh Environment Forest & Climate Change Department changtu Minister, Pu T.J. Lalnuntluanga chuan kum hmasa lama a lo tih tawh thin angin vawiin atang khan a bial Champhai South atanga HSLC & HSSLC (2020-2021) exam-a hlawhtlinna changte lawmpuina thilpek khawtlang hruaitute kaltlangin a hlan.

Pu T.J. Lalnuntluanga chuan a bial chhunga HSLC leh HSSLC zirlai hlawhtlinna changte thinlung taka a lawmpui thu sawiin, an kal zelna turah duhsakna hlanin taima taka an zirlaite zir chhunzawm zel turin a chah a. Hlawhtlinna changte rilru leh thinlung taka a lawmpui rualin hlawhtlinna chang lova vanduaitate pawh beidawng mai lova theihtawp chhuah zawk turin a chah a. Hri leng karah intlawhpawh tawna chibai inbuk a rem loh avangin khawtlang hruaitute kaltlanga inpek mai nise tih a ni, a ti a. Zirlaite an kalzel dan tur leh tuina lamte engtin nge an bawhzui ang tih hrilhhriat kawngah tanlak a tul thu sawiin, hemi hawi zawng hian hma la tura ngaihtuahna sen mek a nih thu a sawi bawk.

Vawiina zirlai hlawhtlinna chang lawmpuina thilpek hlante hi Tuipuiah 13, Chhungteah 7 , Jail Vengah 4 leh Kanan Vengah 59, an vaiin mi 83 te an ni a. HSLC pass-te hnenah J.F Laldailova Dictionary English to Mizo, HSSLC pass-te hnenah Oxford Dictionary English to English-te hlan an ni a. VLTF-te hnenah Hand sanitizer, Face mash bakah, Vawk pul hri laka invenna Sodium hypochlorite leh Chinai-te a hlan a. Kanan Veng khawtlang hruaitute hnenah Oxygen Concentrator a hlan bawk a ni.

Vawiin chawhnu vek khan Forest Minister Pu T.J. Lalnuntluanga hian Mualzen ram Forest Nursery-a DFO Champhai Pu Lalduhthlana hova thingphun hnatlangte chu tlawhin, a hmunah Keifang/Sohphie (Myrica esculenta) tiak a phun bawk a ni.

Miniser hi Pu Lalnunfela Chawngthu, SDO Sadar leh Dr. Lallawmkima, DIRPO Champhai ten an tawiawm a ni.