Vawiin khan Tourist Complex, Berawtlangah Mizoram Agriculture Service Association (MASA) chuan General Conference vawi 7-na an hmang a. Agriculture Minister Pu Lalrinsanga chu khuallian niin Pu H.Biakzaua, MLA, Chairman, Agriculture Development Board chu khual zahawm a ni.

Pu Lalrinsanga chuan Agriculture Department- in kum 2019 chhunga hlawhtlinna a neih te lawmawm a tih thu sawiin kum 2020 ah pawh hlawtlinna duhawm tak an hmuh ngei a beisei thu a sawi a. Kum kaltaa an hlawhtlinna chu kum thar atana bultanna tur a ni, a ti. Fall Army Worm avangin nikum lamah lo neitute leh sawrkarin harsatna an tawk a, kumin pawh hian mi thiamte sawi dan chuan harsatna a thleng leh dawn niin a lang tiin Minister chuan Agriculture mi thiamte chu he harsatna bei let tura inpuahchah turin a chah a ni.

Agriculture Minister chuan State pawn atanga lakluh dal, purun, alu, tel te hian Mizoram mipuite tapchhak zawl a luah rei tawh hle tiin hengte hi keimahni thar ngeia kan thlak thleng a tul tawh, a ti a. Ram dang atanga kan lak luh heng thlaiah te hian intodelh ve thei kan nih angin Agriculture mi thiamten theih tawp chhuah a hun tawh a ni, a ti. Chhungkaw chawm chauh hi sawrkar hna an thawh na chhan a ni lova, mipui tana thawk an ni tih hriaa taima taka thawk turin Pu Lalrinsanga chuan Agriculture officer te a chah a ni.

MASA General Conference hi chawhma lamah Pu RK Nithanga, MASA President chuan a kaihruai a. General Secretary Report ngaihtlak niin member thite sunna hun hman a nih bakah kaisang tharte leh member tharte lawmpuina hun hman a ni.

Chawhnu lam hi session hnihah then niin session hmasa zawk chu Vice President Pu Lalthanzuala’n a kaihhruaiin report ngaihthlak a ni a. Session hnuhnung zawkah ro an rel a. Kum 2020-2022 atana MASA hruaitu turte thlanna hun an hmang bawk.