Champhai khawpui thianghlim, mawi leh hrisel zawk siam kawnga hmalatu tur a din ‘Champhai Town ‘Clean, Beauty and Healthy’ Committee chu din anih atanga a vawi khatna’n Bawrhsap Pu SL Naveen, IAS hovin an thukhawm.

Bawrhsap chuan Champhai Town ‘Clean, Beauty and Healthy’ Committee din anih theihna tur kawnga hmalakna chu a bul tanna chauh anih avangin chawp leh chilhin hmachhawpte a puitlin zung zung theih loh thu leh a bulthum atanga hmalak angaih thu a sawi a. Meeting hmasa ber chu a kamkeuna leh inrawntlanna hmasa anih thu sawiin, member kalkhawmte chu Champhai khawpui fai, mawi leh hrisel siam kawngah ngaihtuahna zau zawk seng turin a chah a ni.

Meeting chuan Champhai khawpui huamchhunga Village Council hrang hrang 18 te chu faina kawnga hnarkaitu pawimawh tak an nih thu tarlangin, VC hrang hrang huamchhung fai leh fai loh endika, tithate lawmman pek nise tha a ti a. Endikna tur atana tehfung leh endiktu tur ruat chu District Urban Development Officer (DUDO) Champhai kutah a dah a. Endikna atanga hmasawn ngaihnate zirchiana a tul anga hmalak tum anih thu tarlan a ni a. Endik hna hi thla thum dan zelah kalpui tum niin, endikna atanga hmuhchhuahte chu District Bawrhsapah thehluh thin tur niin, a tul anga Champhai khawpui bialtu MLA te hnenah thlen thin tur a ni. Heng bakah hian Champhai khawpui thenfaia cheimawina turte, thianghlimna leh hriselna kawnga hmachhawpte thlirho niin, zau zawka inrawnkhawmna department hrangte hrangte huapzo neih leh nise tih ani bawk.

Vawiin meeting-ah hian Pu Mark Lalthanliana, Addl DC, Pu Lalnunfela Chawngthu, SDO Sadar, Department kaihhnawih hotute, Champhai North MLA aiawh, NGO, VC, Chanchinbumite leh NSS hotute an tel a ni.

Attachment

  • Loading attachment...