Vawiin khan Hmarveng Community Hall Mamit-ah Er.H.Lalzirliana, 3- Mamit AC MLA chuan a bial chhung Mamit Hmarveng Branch YMA te'n an din cham Kum 25-na an lawmna Jubilee lungphun khuallian nia hawngin Dr. Lalrozama, IAS, Mamit District Bawrhsap chuan khualzahawm niin Silver Jubilee hi a hmanpui bawk.

Khuallian chuan Hmarveng Branch YMA-in thangduang taka Silver Jubilee a lawm thei chu hruaitu lo ni tawh zawng zawng te, Members te bakah khawtlang nu leh pate inpekna rah liau liau a nih thu a sawi a. Kan District chuan Aspirational District kan nihna chu kan chhawr mek zel a, chhawr tangkai zel thei tura mipui lamte pawh kan inbuatsaih a pawimawh a ni a ti. District dang thlirin tluk lohna leh phak lohna tam tak kan nei mek a, Mamit pawhin nasa takin hmasawnna kan nei ve thei tih inhria a, rual elna thinlung pu turin kalkhawmte a fuih bawk. Mamit khawpui chhunga VC-te chu khawtlang hmasawnna tur leh veng chhung tana theihtawpchhuah turin a chah bawk a ni.

Mamit Bialtu MLA chuan veng tina NGO hruaitute chu nungcha humhalhna kawngah tan la thar tura chahin silai lek chhuah leh YMA member nih chu thil inhmeh lo tak a nih thu a sawi a. Khawpui thang mek kan nih angin kan in sak danah nakin huna khawtlang tana hnawksak tur ang chu YMA leh VC te'n huaisen taka hmala zel turin a chah bawk.

Kan khua leh kan veng chu a neitu tak tak lo chuan min hmangaihsak dawn lova, kan ta, keimahni atanga chhuak ve ang angte ngaihsan nachang hre tlat turin YMA Members kalkhawmte a chah nghal bawk a ni.

He huna Khualzahawm Dr. Lalrozama pawhin thu sawiin YMA Members-te chu YMA thil tum hrerenga che chhuak thin turin a chah a. YMA kan nih anga hun vawn dik uar deuh deuh turin a chah nghal bawk. Mamit Hmarveng chu veng nuam leh thuawih tak a nih thu sawiin khaw chhung thianghlimna leh hmasawnna tura veng dangte kaihhruaitu nih tum turin a chah bawk.

Vawiin Silver Jubilee lawmnaah hian Venghlun Branch YMA, Mamit atanga thusawi ngaihthlak a nih bakah Hmarveng Branch YMA O.B lo ni tawhte chawimawina hun hman a ni a. Hmarveng Branch YMA Table Tennis Hall Mamit Bialtu MLA hian a hawng nghal bawk a ni.

Mamit Hmarveng Branch YMA hi kum 1995 January Ni 10-ah Venghlun Branch YMA atangin a indang a, tun dinhmunah member Mipa 532, Hmeichhia 250 bakah Life Member 13-te nen Members 795 an awm mek a. Silver Jubilee lawmna pual hian Ni 7 January 2020 khan District Hospital Mamit ah Thisen Unit 53 an lo pe tawh bawk a ni.

Vawiin Mamit Hmarveng Branch YMA Silver Jubilee lawmna hi Pu Lalremsanga, President Hmarveng Br. YMA- in a kaihruai a. Silver Jubilee lawmna pual hian Mamit Hmarveng YMA hnenah Mamit Bialtu MLA chuan Computer full set a pe a. Khawtlang huapin Jubilee lawmna ruai kilho a ni bawk.

Attachment

  • Loading attachment...