Vawiin chawhma khan Champhai DC Conference Hall, Keifangtlangah District Bawrhsap Pu SL Naveen, IAS hovin India Republic Day 2020 kumin January Ni 26-a hman dan tur relin Champhaia Sawrkar Department hotute leh NGO aiawhte an thukhawm.

Meeting chuan kumin Republic Day lawmna hun chu Pathianni anih avangin inkhawm tibuai lo turin zingkarah zawhfel nise, hemi hnua buatsaih thin sawmbikte puala ei leh in siamte pawh thulh mai nise a ti a. Republic Day lawmna hmun atan Chhangphut Field ruat a ni a, zing dar 7:30 ah tan nise tiin, Khuallian atan Champhai Bawrhsap Pu SL Naveen, IAS chu ruat a ni a. Meeting chuan Republic Day chu kum dang ang bawkin urhsun taka hman leh nise, he ni pual hian Parade Contingent – armed, unarmed, school leh Band party te neih nise tha a ti a, inelnaa tel leh tithate hnenah lawmman tha tak pek nise a ti bawk.

Vawiin thutkhawmah hian Sawrkar Department hrang hrangte mawhphurhna leh tihturte semrual niin, Member-te hnen atanga rawtna thlente sawiho a ni a. Republic Day puala Parade turte inpuahchahna chu January Ni 21 atanga 23 thleng neih nise, final rehearsal chu January Ni 24, 2019 ah neih nise tih ani bawk.

Republic Day Celebration Committee chuan Republic Day chu India ram ni pawimawh bik anih ang ngeiin Sawrkar hnathawk leh Mipuite chu he ni hi ngaipawimawha kal theuh turin a sawm a. Republic Day puala Football leh Tennis inelna siam tura tanpuina sum dil leh pek dan turte pawh sum awm dan a zira pekchhuah nise tih ani bawk.

Vawiin Meeting-ah hian Pu Rex Zarzoliana, SP Champhai, Pu Mark Lalthanliana, Addl DC Champhai, Sawrkar Department hotute, khawtlang hruaitute, NGO aiawh leh Chanchinbumite an tel a ni.

Attachment

  • Loading attachment...