Vawiin khan Rural Development Department enkawltu Minister Pu Lalruatkima hovin Aijal Club Conference Hall-ah Rural Development Department in Ministry of Rural Development hnuaia kum 2019 a RD Scheme hrang hranga hna an thawhthat lawmman 9 lai an lak te lawmna programme leh Department hnathawhte thlirletna leh hmachhawp te sawihona “Review Meeting” neih a ni.

Pu Lalruatkima chuan kum 2019 chhunga an hnathawh thlirletin hmasawnna tam tak hmuh tur a awm a, hlawhtlinna a takin kan hmu a, chumi zarah lawmman 9 lai kan la thei a, hengte hi thawhhona tha kan neih vang a ni, a ti a. Lawmman kan lak hian Department mai bakah Mizoram leh mipuite kan chawimawi a ni a ti bawk. Lawmman la te zinga Village Council 2 an tel chu a bikin lawmawm a ni tiin, Village Council te tel lovin engmah hlawhtlinna kan hmu thei lova, a bulthum grassroot level a Sawrkar hmalakna hrang hrang a taka tihlawhtling tute an ni a ti.

Minister chuan he hunah hian RD Department officer kalkhawmte chu inpekna thar nen kumthar bul tan tura chahin kan hna aia ngaihpawimawh dang kan nei tur a ni lova, he hna hi Pathianin min pek a ni ti a ngaiin Pathian rawngbawlna rilru pu in kan hna te hi inpekna thar nen thingtlang hmasawnna tur ngaihtuah chunga bul tan turin ka chah duh che u a ni, a ti. Kum kaltaa Department-in sum a hmuh that thu sawiin Minister chuan heng pawisa te hi ram rotling siam nan leh thingtlanga mipuite hmasawnna tur atan a nih angin hetiang hawi zawng vek hian District level leh Block level ah te ruahmanna siam nise a duh thu a sawi.

Pu Lalruatkima chuan Sawrkar hna thawh rau rauah RD Department chu thingtlang mipui te hnaih ber, an innghahna leh an mamawh hrang hrang te tihsaktu an ni tiin BDO thenkhat, Department dang mawhphurhna chelh kawp mekte chu buai chung chung karah pawh RD Department hna ngaipawimawh bik turin a chah a ni. An sawi zel naah Minister chuan thingtlang mipui ten DRDA Project Director leh BDO te lakah beiseina sang tak an nghah thu sawiin hengah te hian tihhlawhtlin theih loh leh pek theih loh an dil chang pawhin chungte chu tawngkam nem leh dam taka lo dawngsawng a, a theih loh chhan te tha taka hrilhfiahin engtik lai pawhin tawngkam thlahdah lo turin a chah bawk a. RD Department chuan sum an khawih avangin an hnathawh kawngah fimkhur leh chik taka hna thawh reng a tul tih sawiin, kan thil sawi sual emaw kan tihsual palh avangin Department pumpuiin a hmingchhiat phah theih avangin fimkhur leh uluk takin kan hna hi i thawk theuh ang u tiin a fuih a ni.

Minister chuan RD Block 26 zinga Block 20 a tlawh tawh thu tarlangin Block dang 6 te chu kumin chhung ngeia tlawhchhuah a tum thu a sawi tel a. Hengah te hian mihlawhtling leh thawk tha te a tlawh chhuah thin thu a sawilang bawk a ni. Minister hian Award dawngtu zawng zawngte chu lawmpuina thilpek a hlan a ni.

Hun kaihruaitu Rural Development Department Commissioner & Secretary Pu Lalhmingthanga chuan Department in kum thum chhungin National Award engemaw zat an dawn thu tarlangin Hmarchhak state 8 leh Himalayan state 3 zingah Mizoram chu Award dawng tam ber kan ni mek a, chuvangin State leh UT te mit Mizoramah a fu a, tha thlah lovin tan kan lak zel a ngai dawn a, tuna kan hmasawnna hi duh tawk mai lovin hmasawnna tur kan la nei zel a ni tih hria a, kan hnathawh tehfung hi kan kham san zel a, hna pawh kan thawh nasat telh telh a ngai a ni, a ti a. RD Scheme hrang hranga tan lakna tur te sawilangin documentation lamah tan la thar turin BDO te a chah a ni.

Kum 2019 chhunga Ministry of Rural Development in thingtlang hmasawn nan Scheme hrang hrang an kalpuiah hna thawk tha te thlang chhuakin, nikum December khan Delhi-ah lawmman an sem a. Hetah hian Rural Development Department chuan National Award, category 6 ah lawmman 9 an dawng a. Chungte chu: Shyama Prasad Mukherji Mission Rurban Mission (SSMRM) ah State te leh UT zingah Overall Performance ah 2-na; Mahatma Gandhi National Rural Employment Gurantee (MGNREGA) ah Implementation of SECURE leh Work Completion ah 1-na ve ve te; DISHA ah 3-na; Deen Dayal Antyodaya Yojana – National Rural Livelihood Mission hnuaia Hmarchhak leh Himalayan State 3 zinga Financial Inclusion ah lawmman 1-na; MGNREGA a Work Completion ah Champhai District in 1-na leh Best Performing Gram Panchayat ah Khawpuar in 3-na; leh Pradhan Mantri Awaas Yojana – Gramin (PMAY-G) ah hnathawk tha lawmman ‘Individual Awards to Field Functionaries for Excellent Work – Gram Panchayat Sarpanch Award chu Pu Robert Lalramchuana, VCP Khamrang leh Awaas Sahayak Award Pi Zirsangliani, VLAA Serchhip Block in an la bawk a ni.

Review Meeting ah hian RD Department in scheme hrang hrang – BADP, SAGY, MNGREGS, SPMRM, Mission Antyodaya, PMAY-G, Social Audit a kalpui mek te chu thlirlet niin tan lakna tur te sawiho a ni a. BDO te hnen atangin an Block huam chhunga kum 2019-20 a hmasawnna leh hmachhawp an neih te ngaihthlak a ni bawk.