Mizoram College of Nursing (MCON) chuan vawiin khan an College Hall-ah Graduation And Lamp Lighting Ceremony an nei a, Agriculture Minister Pu KS Thanga chu khuallian a ni.
Pu KS Thanga chuan nurse la ni mai tura in zir mekte hnenah nurse hna chu inpekna tak tak nena thawh chi, khawngaihna rawngbawl hna a ni, a ti a. Doctor-te aia damlote bula awm tam zawk leh enkawltu ber an nih avangin nurse-te hi damlote tana Pathianin a aiawha a dah an ni a, hlim taka damlote bula awm a, thlamuantu ni turin Minister chuan a fuih. Mizo nurse-te hi khawvel hmun dangah pawh kal se an duai lo va, thiamna kawngah hnam dangte aiin an hniam lo tiin hna hahthlak a nih avangin taimak leh tawrhchhel erawh a ngai, a ti a, rinawm leh taima taka thawk turin nurse zirlaite a fuih a ni. Bialtu MLA ni bawk Pu K.S.Thanga chuan a bial chhunga hmasawnna hnathawh thenkhatte sawiin Central leh State atanga sum hmuh belhkhawmin a bial chhungah cheng vaibelchhe 200 chuang kan hmuchhuak tawh, a ti a. Falkawn leh a chhehvel tlangdungah hmasawnna ruhrel din thar hmuh tur engemawzat a awm tiin Mizoram College of Nursing pawhin hma a sawn zel a beisei thu a sawi a ni.
Nursing School, Civil Hospital Aizawl hi kum 1980 a din tan niin BSc (Nursing) course zirna hawn a nih hnuah a hming hi Mizoram College of Nursing tia thlak a ni a. Kum tin 1st year zir thar tur mi sawmthum lak thin an ni. BSc (Nursing) hi kum 4 course a ni a, zirlai 120 awm reng ang an ni. Vawiin programme-ah hian zirlai thar mi 30 te hian Pi Zothankimi Sailo, Principal Nursing Officer, Health Worker Training Institute kaihhruaina hnuaia hbati chhi chungin nurse rawngbawl hna rinawm taka thawk turin thu an tiam a ni.
Kum 2017 Mizoram University hnuaia exam result chhuakah MCON final year zirlai za ah za an pass a, top ten-ah mi pali an lang a ni.Kumina pass thar te nen graduate hi 255 an nei tawh a. Syllabus hi Indian Nursing Council siam an ring a, Mizoram University hnuaiah zir a ni thung. Aizawl Civil Hospital, Kulikawn Hospital, Mizoram State Cancer Institute leh Falkawn Referral Hospital ah clinical experience atan an duty thin. Vawiin programme-ah hian MZU in result a tihchhuah taka pathumna hauhtu K Vanlalruati hnenah proficiency award hlan niin academic excellence award hi year tina zirlai pakhatna theuhte hnenah pek an ni a, theory leh practical-a kum li chhunga kai kim vek zirlai pasarihte hnenah best attendance award an hlan bawk.
Graduation and Lamp Lighting Ceremony ah hian Pi Lalbiaksangi, Jt. Director (N) chu khual zahawm a ni a. Principal Pi Lalchhanhimi chuan MCON chungchang report pe in Pi Lalhriatpuii Varte, MCON Lecturer chaun lawmthu sawiin hun hnung a khar a ni.
