1367/2023-2025
Aizawl, August ni 3, 2023: Vawiin khan Agriculture Department buatsaihin Aijal Club-ah Agriculture Department buatsaihin ‘Mega Oil Palm Plantation Drive-2023’ hman a ni a. Agriculture Minister Pu C. Lalrinsanga chuan khuallian niin a hmanpui a. Oil palm chingtu hlawhtling thlanchhuahte hnenah “Best Farmers Award 2023” sem a ni bawk.

Thu sawiin khuallian chuan sawrkar laipuiin an ruahman anga he Mega Oil Palm Plantation Drive hi Mizoram district tin ah kar hmasa lam atanga hman tan a nih thu a sawi a. Oil Palm chingtute’n hlawhtlinna an hmu chho zel chu lawmawm a tih thu sawi bawkin, beiseina sang tak a neih tir a ni, a ti a. Sawrkar laipui leh state sawrkar in oil plant plantation a ngaihpawimawh thu leh, state hmalakna hrang hrang te a tarlang a. Heng zawng zawng hlawhtlinna chu taimak naah thui tak a innghat a ni, a ti. Minister chuan Oil palm farmer te chu an tharchhuah a lo tam zawk theih nan plantation area zauh zel bakah kung khat in tharchhuah zat a tam thei ang ber tharchhuah a nih nan plantation tihna tur hmun thlan fimkhur te, tui leh leitha hmanga enkawl zui pawimawhna te a sawi bawk a. Farmer te’n hlawkna an tel chu an eizawnna a lo than belh zel theih nan remhre taka an hlawkna te chu h,mang thiam tura chah in, thlai tichhe thei natna leh thildang lo awm thulah pui turin sawrkar chu a inpeih reng thu a sawi.

Mega Oil Palm Plantation Drive-2023 atana mi sawm bik, Pu H. Rammawi, Vice Chairman, Mizoram State Planning Board chua thu sai bawkin, sawrkar laipuiah hmalakna tur dil a project siam chungchangah fimkhur leh uluk a pawimawh zia leh, mithiam rawn tam a pawimawh thu te a sawi. Ani bakah hian Dr. Kancherla Suresh, Director, ICAR-IIOP chuan thu a saiw bawk a. Godrej Agrovet Ltd. Leh Patanjali Foods Ltd. aiawh te hnen atangin Mizorama Oil Palm chingtute nen an thawhhona leh hmalak zelna tur te, harsatna an tawh thenkhat leh hamthatna siam belh theih turte ngaihthlak a ni bawk.

He Mega Oil Palm Plantation Drive hi Dr. Lalrozama, IAS, Agriculture Department Secretary chuan kaihhruaiin, Oil Palm ching hlawhtling mi pathum – Pu Ramtinchawma, Nalzawl, Mamit District, Pu Lallawmzuala, Serchhip, Serchhip District leh Pi F. Lalhlimpuii, Bairabi, Kolasib District te hnen atangin Oil Palm chin kawnga an tawn hriat ngaihthlak a ni a. Mizorama Oil Palm chin leh hmalak dan tlangpui Power Point Presentation hmanga ngaihthlakho a ni. Heta tarlan a nih dan in India ram chuan ram dang atanga hriak ei chi (Edible Oil) a lakluh tihtlem nan Oil Palm chin kawngah hma a la thar a; Scheme thar, “National Mission on Edible Oils – Oil Palm (NMEO-OP)” chu sum cheng vaibelchhe 11,040/- hman turin a ruahman a, Mizoramah pawh kum 2022 atangin he scheme hmang hian hmalak ve a ni. Agriculture Director Pu James Lalsiamliana chuan lawmthu saiin hun a khar a ni.

Mizoramah hian Oil Palm chin leh sawngbawl a nih theih nan December ni 2, 2004 khan ‘The Mizoram Oil Palm (Regulation & Processing) Act’ chu pawm a lo ni tawh a, chu Act hmang chuan kum tina tlangram loneih tihtlem leh hriak hmanga intodelh a nih theih nan hmalak chhoh a ni ta a, loneitute leh Oil Palm atana thawhpui (Partners Company) – Godrej Agrovet Pvt. Ltd. leh Ruchi Soya Industries Ltd. (Patanjali Foods Ltd. tia thlak) te nen thawh hona tha tak kalpuiin hlawhtlinna hmuh chhoh mek a ni.

He “Mega Oil Palm Plantation Drive-2023”-ah hian Oil Palm chingtu loneitu engemaw zat telin Directorate of Agriculture-a thawktu Officer engemaw zatin an chhim bawk a ni. District hrang hrang atanga “Best Farmers Award 2023” dawngtute chu –

1) Mamit District - Ramtinchawma, Nalzawl; Ani hian 31.89 ha a zau ram chhungah Oil Palm kung 4560 neiin, kum 2022-23 chhung khan quintal 4071.85 a hralhchhuak a ni.

2) Aizawl District - C. Vanlalthlamuana, Armed Veng: Ani hian 4.265 Ha a zau ram chhungah Oil Palm kung 610 neiin, kum 2022-23 chhung khan quintal 153.53 a hralhchhuak a ni.

3) Serchhip District: Lalremruata Royte, Serchhip Darnam Veng: Ani hian 3.56 Ha a zau ram chhungah Oil Palm kung 509 neiin, kum 2022-23 chhung khan quintal 75.47 a hralhchhuak a ni.

4) Kolasib District: Zomuansanga Ralte, Khamrang: Ani hian 23 Ha a zau ram chhungah Oil Palm kung 3293 neiin, kum 2022-23 chhung khan quintal 1774.40 a hralhchhuak a ni.

5) Lunglei District: Lalrinthanga, Khawmawi: Ani hian 3.85 Ha a zau ram chhungah Oil Palm kung 550 neiin, kum 2022-23 chhung khan quintal 379.59 a hralhchhuak a ni.

6) Lawngtlai District: Tarit Kanti Chakma, Chawngte C: Ani hian 2.50 Ha a zau ram chhungah Oil Palm kung 370 neiin, kum 2022-23 chhung khan quintal 307.00 a hralhchhuak a ni.