1368/2023-2025
Aizawl, the 3rd August 2023 : Health & Family Welfare Minister Dr. R. Lalthangliana’n vawiin khan Directorate of Medical & Hospital Services (DHME) Auditorium MINECO ah drugs inchiu thin ‘people who inject drugs (PWIDs)’ te zinga Hepatitis C (HCV) dinhmun hriatna leh a veite enkawlna tur project, Mizoram District 2 HCV hmuhchhuah tamna– Aizawl leh Champhai a tan tur project ‘Uniting for a Hepatitis-C Free Mizoram chu a hawng.

Health Minister Dr. H. Lalthangliana chuan hepatitis chi hrang hrang zingah Hepatitis C chu Mizorama hmuchhuah tam bik a nih thu sawiin Hepatitis C bik hi a hri danna vaccine a awm lova, mahse a inenkawlna man hi a sang a. Natna hri hmuchhuah lamah thawktu pawl lian tak FIND leh khawvel huap pawha damdawi company lian Roche in Mizoram District 2 tan hetiang project an ruahman hi a lawmawm a. Anni tanpuinain MSACS leh NHM ten thawk dunin hepatitis umbo nan ruahmanna an siam hi theihtawp kan chhuahpui dawn a ni, a ti. Health & Family Welfare Department in mipui hriselna kawngah pawl hrang hrang thawhpui an tam thu sawiin a thente chu hlawh nei lo hial ten an thawk a, an inpekna hi a ropui a, hriselna lamah pawl hrang hrang ten Department an thawhpui naah lawmthu a sawi a ni.

He project hnuaiah hian Aizawl leh Champhai District a inchiu thin PWIDs te chu an HCV dinhmun test vek an ni dawn a, test a positive te tan a nemghehna test confirmatory test an tih sak leh anga chumi atanga HCV vei hmuhchhuahte chu enkawlna pek an ni dawn a ni. He project bultumtu hi khawvel huapa natna hri hmuhchhuahna diagnostics lamah thawktu pawl FIND leh damdawi company Roche te an ni a, anni hian MSACS leh NHM hnuaia National Viral Hepatitis Control Programme te an thawhpui dawn a. He project hi nakum August thla thleng kalpui tum a ni.

Project chungchang sawihawnna hi Dr. Kanudeep Kaur, Project Lead, FIND hnen atangin ngaihthlak niin Mizoram HVC dinhmun chu Dr. Ruth Lalmuanpuii, DD, DHME in a sawi a. MSACS PD Dr. Lalthlengliani leh NHM PD Dr. Eric Zomawia te pawhin he ruahmanna hnuaia hma an lak dan tur an sawi bawk a ni.