1369/2023-2025
Kolasib dated 3rd August 2023: Vawiin chawhnu khan zirlaite hnen a HIV lak a inven dan, in enkawl dan leh a hrik vei te thinhrik lova tha tak a enkawl dan zau zawk a inhrilhhriatna kalpuina turin Mizoram State AIDS Control Society chuan District AIDS Prevention & Control Committee kaltlang a ‘Red Ribbon Quiz Competition’ buatsaih dan tur relin thutkhawmna neih a ni a. Pu John LT Sanga, Deputy Commissioner chuan thutkhawmna hi kaihruaiin Pi Lalzuiliani, Joint Director, IEC Division, MSACS chuan Quiz hmang a inelna kalpui dan tur sawi zauna a nei bawk a ni.

Thutkhawmnaah hian ruihhlo leh mipat hmeichhiatna hmansualna lak a la fihlim te an fihlim zel theihna turin Middle School, High school leh Higher Secondary School an kal lai atanga HIV chungchang zirtirna pek a pawimawh thu tarlan a ni a. Chuvang chuan zirlai kum 13 atanga 17 inkar, pawl 8, 9 leh 11 tan HIV chungchang inzirtirna kalpui nan Kolasib district chhung a school 50 aia tlem lo ah ‘Red Ribbon Quiz’ buatsaih a nih tur thu sawi a ni. School level-a inelna a titha Team 10 thlanchhuah te hian September thla tir ah District level-ah inelna an nei leh ang a, pakhatna hian Rs. 5000, pahnihna in Rs. 4000, pathumna in Rs. 3000 leh Consolation prize 2000 an dawng dawn a ni. District Level-a pakhatna hi State Level-a inelna a tel tur an ni bawk ang.

School level-a inelna hi August thla chhung a kalpui hman tur tih a ni a, Team khat ah mi 2 zel awm tur niin Mizoram pum a Quiz zawhna hman tur hi MSACS lamin a inang vekin an buatsaih dawn a ni. Thutkhawmna ah hian khaw chhung leh pawn hmun laili lai ah HIV lak a inven dan leh inenkawl dan thu leh lem ziak tarchhuah dan turte rel a ni bawk.