Vawiin khan Mizoram Agriculture Service Association (MASA) chuan Multipurpose Hall, Berawtlang-ah General Conference vawi 6-na an hmang a, Agriculture Minister Pu K.S. Thanga chuan Khuallian niin a hmanpui. 

MASA President Pu R.L.Thanzuala kaihhruai General Conference hawnna inkhawmah Pu K.S. Thanga, Agriculture Minister chuan fuihna thu sawiin Agriculture Department chu Sorkar-in a ngaihthah lo va, a lo enkawl thintu Minister pawh mi fel tak tak a lo dah thin a ni, a ti a. Department hmalakna thenkhat tarlangin, tuna Agriculture Directorate hmunah hian ‘Agriculture Growth Centre’ sak tura ruahman a ni a, DPR peih fel thawkhat tawh a niin hemi atan hian cheng vaibelchhe 45 dah a ni nghe nghe tih a sawi a.  Rei loteah a satu tur thlan a ni ang a, sak zawh a nih hunah chuan loneitute tan an thlai thar chhuah hralhna hmun remchang tak, Department nena inhne renga an awm theihna tur a nih Sorkar chuan a beisei a ni, a ti. Pu K.S. Thanga chuan kumin chhungah Agriculture Link Road atan Rs.30.00 Crore dah a ni a, Sorkar-in a ngaihpawimawh em avangin cheng vaibelchhe 20 a dah belh a, hei hian loneitute dinhmun nasa taka a chawikan a beiseiawm hle a ni, a ti bawk.  Heng bakah hian Khuallian chuan Farm Mechanisation lam sawiin Zoram hmun hrang hrangah Custom Hiring Centre engemaw zat dah a nih tawh thu leh Power Tiller pawh Subsidy-a loneitute hnena pek reng a nih thu a sawi bawk.  MASA Member zawng zawngte chu Pu K.S. Thanga chuan Pathianin mi dangte rawngbawl tura finna leh thiamna a pek chu rinna mumal tak neiin an hnate Pathian rawngbawlnaah ngaiin theihtawp chhuaha thawk turin duhsakna a hlan a ni.

MASA Adviser Pu J. Lalzamliana, Director of Agriculture (Crop Husbandry) pawhin Member-te fuihna thu tha tak a sawi bawk. General Conference hawnnaah hian Report hrang hrang ngaihthlak a niin tun dinhmunah Member 130 awmin Post hnawh khah tawh hi 101 niin la hnawh khah loh hi Post 38 a la awm a ni.  Kum 2016 atanga he Conference inkara Member thi, Pu V.L. Khawngaiha, AEO leh Pu J.M. Dawngliana, SMS (Plant Protection) te sunna hun hman a nih bakah hemi hun chhunga Member Promotion hmu mi 19-te hnenah lawmpuina thilpek hlan a ni bawk.

Pu Tlangtimawia Zote, Vice President, MASA chuan lawmthu sawina hun a hman hnuin he General Conference Inaugural Function chu tihtawp a ni a.  Chawhnu lamah rorel leh kum 2018-2020 chhunga MASA hruaitu tur thlanna hun hman a nih hnuah hlim tak leh tlai taka zanriah kil ho a ni.