Vawiin khan Finance minister Pu Lalsawta chuan Mizo High school field, Zarkawt atangin Ola a in ziaklut taxi engemawzat a vai liam a, he hunah hian Ola hotute bakah UD&PA Secretary Dr C.Vanlalramsanga , Transport department-a mi pawimawhte leh Ola partnered Taxi driver ten an tel pui.

Finance Minister Pu Lalsawta chuan thu sawiin, Ola Cab Aizawl chhung leh Lengpuiah hman theih a a awm ta chu lawmawm a ti a, Aizawl mipuite tan mel lung pawimawh tak leh chhinchhiah tlak ani, a ti. Pu Sawta chuan Ola cab chu Aizawl smart city a kan siam theih nan a hmalakna kawng pakhat a ni, a ti a, Ola cab in a tum chu mipuite veivahna awlsam zawk siam sak te, khawpui chhunga lirthei in boruak thianghlimlo a pek chhuah tih tlem te, lirthei hman man tlawm zawk siam te leh lirthei hmang tute tan a veivahna him zawk buatsaih sak a ni, a ti. Pu Sawta chuan, hmasawnna awm tur chuan kal dan phung te her danglam a ngaih thin thu sawiin, Ola cab pawh hi thil thar, mipuite tan leh lirthei khalhtute tana tangkai tak a nih ngei a beisei thu a sawi. Ola cab hlawhtlin nan a pawimawh ber chu lirthei khalhtute an ni a, driver te chuan mipui leh ram tan a rawngbawl naah ngaiin an lirthei khalh na kawngah taimakna, hawihhawmna, dawhtheihna leh rinawmna vawng tlat turin a chah bawk.

UD&PA Secretary Dr. C. Vanlalramsanga chuan Ola cab a taka kan hmang thei ta chu lawmawm a tih thu sawiin, Ola cab chhawr tu tur te chu Aizawl mipuite mai bakah ram pawn atanga mikhual zin veivakte an ni dawn a chuvang chuan Driver-te an pawimawh hle dawn a ni, a ti.

Ola Cab vai liamna hun hi Pu Kundan Jha, City manager, Ola Cab in a kaihruai a, November 2017 atang khan hmalak tan niin, tun dinhmunah  Aizawl Taxi 200 vel inziak lut tawhin inziah luh belh an awm mek bawk a ni.