Vawiin khan Lawngtlaia Chapchar Kut 2018 hman dan tur relin Organising Committee chu an Chairman Lawngtlai DC Dr Arun T., IAS hovin DC Conference Hall-ah an thu khawm.

State leh LADC hnuaia office hotu lute leh tlawmngai pawl ai awhte telna Chapchar Kut Organising Committee chuan Chapchar Kut 2018 chu hman ngei tha a ti a. Kut hman nana thil tul hrang hrangte sawi ho niin, hlung taka hman a nih theih nan ruahmanna siam a ni.

Chapchar Kut hi March 2, 2018 hian Lawngtlai DC office tualah hman tur a ni a. Kut Thlengtu atan Lawngtlai DC leh Kut Pa atan bialtu Minister/MLA te ni se, tih a ni a. Kut hawnna atan hlado chham chungin tlang tlir a ni ang a, zaipawlin Kut hawnna hla an sa ang. Hemi ni hian hnam lam chi hrang hrang en tur leh hnam zai ngaihnawm tak tak ngaihthlak tur a awm ang a. Ram pum huap zaithiam lar tak leh tualchhung zaithiamte pawh sawm tum an ni. Chapchar Kut Miss pawh thlan leh tum a ni a. Costume parade leh chhawnghnawh te pawh tih tel tum a ni.