Vawiin khan Health & Family Welfare Department enkawltu Minister Pu Lal Thanzara chuan District Hospital, Mamit ah Damdawi Man Tlawm Zawrhna Dawr (Generic Drug Store) Jan Aushadi Drug Store chu a hawng.

Pu Lal Thanzara chuan Pradhan Mantri Bhartiya Jan Aushadi Kendra, Mizo ten Damdawi Man Tlawm Zawrhna Dawr tih kan hriat lar hi Prime Minister in hriselna, a bik takin mi harsa zawka ten damdawi tha, man tlawm zawka an lei theihna tur atan a ngaihtuah chhuah a nih thu sawiin scheme pawimawh tak a ni a ti a. Jan Aushadi Kendra a damdawi zawrh te hi a that dan te, a chak dan te leh a quality te hi mithiam ten an test vek hnuin zawrhchhuah ani a, a tlawm avangin rinhlehna tur a awm lova, damdawi man to te nen a thawhdan a in an reng thu mithiamte pawhin an sawi fo chu chu a tarlang a ni. 

Health Minister chuan generic damdawi hman uarna kawnga doctor te chu, a pawimawh ber anih thu sawiin mipui leh damlo ten doctor ah rinna an nghat nasa a, doctor ber ten an chawh lem loh chuan damlo tan damdawi hriat leh lei ngaihna a awm lova, chuvangin doctor te pawhin damlo dinhmun ngaituahin, a bik takin mi harsa zawkte ten heng damdawi man tlawm te chawh turin kan ngen nawn duh cheu, a ti a. Ram changkang te pawhin generic damdawi an hman nasat thu tarlangin Medical Council of India (MCI) pawhin hemi kawngah hian hma an lak thu a sawi bawk. 

Mamit District Hospital khum 100 a tih lenna tur project chu NEC in an retained leh tih sawiin soil testing te tih hnuin he project hi thehluh leh a ni ni dawn a, project hi an sanctioned ngei ka beisei  a ni, a ti. Health Minister chuan Sawrkarin in hriselna a ngaipawimawh avangin District Hospital te chu a thei ang angin kan thuam chho mek a, Mamit District Hospital tan pawh NEDP kaltlangin X-ray khawl te, ultrasound khawl te leh endoscope te lei a ni a, hei hian nasa takin hriselna lamah mipui mamawh a phuhru ka beisei a ni, a ti. 

Jan Aushadi Kendra hi vawiinah hawn nen hian Mizoram 8 a awm ta a. Aizawl District bakah Lunglei leh Mamit District a awm tawh a. District Hospital zawng zawnga hawng turin ruahmanna kalpui mek a ni a. Hruaizel Pharmacy hi he thilah hian implementing partner niin kumin chhung ngeiin District Hospital zawng zawngah hetiang dawr hi hawn anih thei nan anni leh Department in hma an la mek a ni. Jan Aushadi Kendra a damdawi zawrh te hi damdawi siamtu, sawrkar enkawl company-te inzawmkhawm Bureau of Pharma PSUs of India (BPPI) buaipui vek a ni. 

Programme hi Dr. PC Lalliannghaka a kaihruaiin Pu Lalsawma, Joint Director (Food & Drugs) chuan generic damdawi chungchang sawiin, a tlam chhan leh damdawi man to te nena tehkhinin a that dan a in an reng thu te a sawi a. Hruaizel Pharmacy neitu Pu B. Hmangaihkiman lawmthu sawiin hun a khar a ni.