2634/2024-2025

Aizawl 22nd October, 2024 : North-Eastern Regional Agriculture Marketing Corporation (NERAMAC) leh Ministry of Agriculture & Farmers Welfare, Govt. of India buatsaih India rama Buhtun chawikanna (Promotion of Millets in India) Programme, ni hnih awh tur Aijal Club-a neih chu Pu P.C Vanlalruata, Agriculture Minister chuan khuallian niin a hmanpui.

Khuallian chuan tunhma chuan lo-a buh karah buhtun hi chin thin a ni a, hun rei tak hnuah buhtun chin uar tura NERAMAC hmalakna chu lawmawm a ti a. Mizote'n kan hriselna kawngah hma kan sawnpui ngei a rin thu sawiin a bik takin Zunthlum natna neite'n hlawkna nasa tak an chan theih a beisei thu a sawi.

He hunah hian Pi Ramdinliani, IAS, Agriculture Director chuan Buhtun chu thlai fei tak, sik leh sa ngam tak chin awlsam si, chaw tha em em a nih avangin Mizoram-ah pawh kan uar lehzual a ngaih thu a sawi a. Tunhma chuan Mizo pawhin buhtun hi chaw nen chhum kawpin kan ei thin a, tunlai thangthar te'n kan ei tam ta loh chu a veiawm tiin a value addition lam uar a, buhtun product ei tam turin kalkhawmte chu a chah a.

Millets lama entrepreneurs hmala duh te tan pawh India sorkar chu a inhawn hle thu a sawi bawk a ni. Ani bakah hian Pi Pankaja Borah General Manager/Officer-in-charge, RO NABARD pawhin Buhtun chu chaw tha, mihringte hriselna thlen thei anih piahlamah ruahtui a mamawh tlem avanga enkawl awlsam tak anih thu sawiin ching uar deuh deuh turin kalkhawmte chu a chah bawk a ni.

He Programme-in a tum ber chu Buhtun (Millets) chu chaw hrisel leh tha anih avanga mipuite'n kan ei tam a pawimawh thu inzirtir a, inhrilhhriatna niin Programme a tel kuthnathawktute nen sawihona hun tha tak hman ho a ni bawk.

Vawiin programme-ah hian Commodore Rajiv Ashok (Retd), MD, NERAMAC chuan kalkhawmte lawmna thu sawiin India ramah Kum 2018-ah year of millet puan a ni a. Khawvel pumah Kum 2023-ah year of millet puan a ni bawk. Vawiinah hian buhtun hmanga sumdawng leh ei tur siam te stall hawnga an lo tel thei chu lawmawm a tih thu sawiin Buhtun-ah hian ei tur tha protein, fibre leh Glycemic index a hniam avangin diabetics patients te tan a tha em em a. Buhtun chin hi a awlsamin tui a mamawh tlem tlem a ni a ti.

Programme hman zawh hian Buhtun atanga ei tur siamchhuah chi hrang hrang phochhuahna Stall 12 Minister hian hawng zui nghalin, vawiin tlai dar 5 thleng mipui a duh apiangte tana en leh lei theiha chhawpchhuah nghal a ni a. Naktuk a ni hnihna-ah hian mipuite tan chawhnu dar 2 thleng Stall hawn chhunzawm a, B2B (Business to Business) session neih tur a ni ang.

He hunah hian khaw hrang hrang atangin FPC (Farmer Producer Organisation) te leh Thutharthehdarhtute an tel a ni.