2635/2024-2025

2024 Khuangchawi thla ni 22: Healthy Lunglei District Campaign hnuaia hriselna kawnga hma lakna kalpui mek atana Lunglei District Deputy Commissioner Office-in RailTel Corporation of India Limited, New Delhi aṭanga Corporate Social Responsibility (CSR) kal tlanga ṭanpuina sum an hai chhuah hlawhtlinna tur atana inremna thuthlung (memorandum of understanding - MoU) chu vawiin khan Lunglei District Bawrhsap Pu R. Lalṭhazuala leh RailTel Corporation-a Executive Director (CC) Pu Harish Pawaria te'n an ziak fel.

Lunglei Bawrhsap pisaa MoU ziahnaah hian Bawrhsap hi Additional DC Pu James Miahlung, Election Officer Pi R. Lalrinzuali, Deputy CMO Dr Lalrinthangi leh DIPRO Pu C. Lalhruaitluanga te'n ṭawiawmin, RailTel Corporation aṭangin Executive Director Pu Harish Pawaria hovin thawktu dangte'n ral aṭangin Google Meet kal tlangin an lo chhim ve bawk a ni.

Lunglei Bawrhsap Pu R. Lalṭhazuala chuan Healthy Lunglei District Campaign hnuaia khua leh tuite hriselna dinhmun endikna leh hriselna lam inzirtirna beihpui thlak mek atana RailTel Corporation te'n CSR kal tlanga ṭanpuina an rawn pe thei tur chu lawmawm a tih thu sawiin, RailTel Corporation hotute hnenah District ai awhin lawm thu a sawi a. Healthy Lunglei District Campaign chu kumin June thla aṭang khan ngawrh taka kalpui chhoh mek a nih thu sawiin, Lunglei District chhung thingtlang khaw kilkhawr zawkte hrut chhuak turin endikna hmanrua (test kit) leh chet velnaah sum mamawh a san avangin pawn lam aṭanga ṭanpuina awm theite an dap tih a sawi a. RailTel Corporation aṭanga ṭanpuina an hmuh tur chu District chhung hmun kilkhawr ber thlenga tuam chhuak turin ṭangkai takin an hmang thei dawn tih a sawi.

RailTel Corporation hi sawrkar laipui hnuaia Navratna central public sector enterprise (CPSE) pakhat niin, khawl hmanga ral khata inbiakna leh inthlun zawmna (information & communication technology) lama India ram puma rel kawng, khawpui leh thingtlangah te inzar pharha hma latu lian tak an ni a. Vawiina MoU ziah fel tak ang chuan, Healthy Lunglei District Campaign atan hian RailTel Corporation hian CSR kal tlangin Lunglei DC office-ah ₹ nuai 18.92 an rawn pe dawn a. Ṭanpuina sum an rawn pek tur hi ṭum lia pek tlak tura ruahman niin, ṭum khatah ₹ nuai 4.73 zelin an rawn pe chhuak dawn a ni.

Attachment

  • Loading attachment...