173/2023-2024
Dated Serchhip, the 21 st April, 2023: Vawiin khan Pu C. Lalrinsanga, Minister, Agriculture, Irrigation & Water Resources, Cooperation, etc., chuan Serchhip Agriculture Complex a RKVY RAAFTER 2021-22 atanga din Bekang hriak herchhuahna khawl thar leh a dahna in thar a hawng a, loneitute hnenah hmanrua engemawzat a sem bawk.
Minister hian thusawiin, Tel hi kan ei nasat avangin Tel thianghlim ngei ei a pawimawh hle a. A thianghlim tawk lo kan ei tam chuan hrisel lohna tam takin min tlak buakzui thei a ni. Tel hi kan tharchhuah theih thlai anih avangin loneituten nasa zawka tel lam chi kan thar a tul hle a, sawrkar pawhin hmalakna lian tak tak a kalpui reng a ni. Kan tharchhuahte awlsam taka kan her zung zung theih nan vawiina kan hawn a herchhuahna khawl hi a tangkai hle dawn a ni. Serchhip district a loneituten tangkai taka in lo hman kan duh em em a ni. A herna khawl lian zawk hi Falkawnah bun tura hmalak mek bawk a ni, a ti. Mizorama loneitute kal kawng hi Cooperative movement nena inhne rem taka kan kalpui avangin hma kan sawn zel a, kan thlai tharte pawh India ram pawnah, USA thleng hialin kan thawnchhuak tawh a ni. Sawrkar hian loneitute hmakhua hi a ngaihtuah nasa em em a, Oil Palm chingtute hmakhua pawh nasa takin kan ngaihtuah zel a ni, tiin loneitute tana sawrkarin hmalakna a kalpui hrang hrang te a tarlang a. Kan ram hi kan ta a ni a, tuman min thawhsak dawn lo. Keimahni ngei hian taima taka thawkin hma lam i pan zel ang u, tiin a sawm a ni.
Minister hian Oil palm chingtu chhungkaw za hnenah Aluminium leihlawn leh Hreité (Tomahawk) a hlan a, district chhunga thlai (vegetables) chingtu intelkhawm Farmer Interest Group panga heng; Leng, Hualtu, Zawlpui-Chamdur, E. Lungdar leh Thenzawl te hnenah Multi Purpose Crates (Plastic basket) 20 theuh a hlan bawk.
Khualzahawm Pu James Lalsiamliana, Director, Agriculture Department pawhin thusawiin Oil Palm chin hi Mizoram Assembly in kum 2004 ah a pass a, company te nen inremna neiin 2005 atangin kan ching zui ta a. Godrej Agrovet ten Bukvanneiah a herna khawl an din zuia, vawiin thleng tha takin hna an thawk. Kum 2008 atangin loneituten an hralh tan a, tun hnaiah kan tharchhuah a pung hle nghe nghe. Sawrkar laipuiin a man hi Oil dangte man a bithliah thin mila a bithliah ve tak avangin thlatin a rate hi a danglam ve hret hret a, tunah hian kg 1 Rs. 10.54 vel a ni. Central Scheme a nih avangin Central duhdan zulzuia kan kal ve zel a ngai bawk, tiin oil palm dinhmun a tarlang a ni.
Khawl thar lawmna leh hmanraw semna inkhawm hi DAO Conference Hall ah neih a ni a. He hun hi Pu Tlangtimawia Zote, DAO chuan kaihruaiin, Rev. VL. Nithanga'n hunserh a hmang a, Pu K. Laltlanmawia, Deputy Director chuan technical report a pe a ni. Hriak herna khawl thar dahna in hi RKVY- RAAFTER 2021-22 sum Rs 20 lakh in sak a ni a, hriak herna khawl hi Rs. 2.8 lakh in lei a ni. Khawl hian Bekang, Chhawhchhi, Tel Antam leh Badam te a her thei vek a, Bekang ah an insawrbing deuh dawn a ni.
Serchhip district ah hian Oil Palm hi khaw 12 ah chin mek niin chhungkua 334 in a huan an nei a, kung 47762 an enkawl mek a. Mi pakhatin kung 150 enkawl ang zela chhut niin ram 386 Ha. A zauah an chinga ni. Serchhip district atanga Oil palm hralh tawh zawng zawng hi 4777 qtls a ni a, chhungkaw 53 chauhvin an la hralh thei rih a ni.
