174/2023-2024

Kolasib dated 21st April 2023: Vawiin khan I&PR Conference Hall, Project Veng, Kolasibah ‘National Civil Services Day 2023’ pual a hun hman niin Pu John LT Sanga, Deputy Commissioner, Kolasib chu khuallian a ni a. Kolasib district chhunga sawrkar hnathawk tha mi 3 leh PHED, Kolasib WATSAN Division hnen ah chawimawina thu ziak hlan an ni.

Khuallian Pu John LT Sanga, Deputy Commissioner chuan mipui rawngbawl a Sawrkar hnuai a hnathawktu zawng zawngte chu ‘Civil Service’ tih hian a huam thu sawiin Sawrkarna tha siam tur leh mipui rawngbawl tur a ruangam pawimawh ber an nih thu a sawi. India ram a Civil Service kalphung mumal tak a awm theih nana mi thawhhlawk tak takte chanchin Pu John LT Sanga chuan tarlangin Sardar Vallabhbhai Patel, Union Home Minister-in All India Civil Service Training School, Metcalfe House, Delhi-a April ni 21, 1947-a Civil Service pawimawhna thuchah ropui tak a sawina ni a nih angin ‘National Civil Services Day’ atan hman a nih thu a sawi. He ni pawimawh tak hi mipui rawngbawl a Sawrkar hnuai a hnathawk zawng zawngte inpawhtlan nan te, inenlet nan leh sawt zawk a mipui tan a rawngbawlna kalpui a nih theih nana thawhhona tha siamna hun atan hmang turin kalkhawmte a chah.

Kolasiba ‘National Civil Services Day 2023’ pual a hun hmanna hi Pu Malsawmtluanga, Project Director, DRDO in kaihruaiin Dr. Lalhruaipuii, Senoir Scientist, ICAR, Pu Timothy R.Lalhmangaiha, BDO, Bilkhawthlir leh Pu Goerge Lalhruaia, SDO, PHED-te hnen atangin Kolasib chhunga sawrkar hmalakna hrang hrang kalpui dan ngaihthlak a ni a. Kolasib district chhunga Sawrkar office hrang hrang hotute leh CZS leh St. John’s Higher Secondary School zirlaite he hun ah hian telin sawrkar hmalakna chungchanga inkawmhonate hman niin Pu Lalrinawma Traite, SP, Kolasibin lawmthu sawina hun a hmang bawk a ni.

Pu Timothy R.Lalhmnangaiha, BDO, Bilkhawthlir chuan Kolasib district chhung a Village Council 57 hnuai ah MGNREGS Card nei mi 20,905 te tan ni 100 inhlawhna kawng hrang hrangin an siam sak thin thu te, khawtlang intawm tur tui chhekkhawlna, Amrit Sarovar engemaw zah siam zawh a nih tawh bak ah siam belh tur a ruahmanna a kal mek thu te leh ruah tui khawl leh ram ngaw tih zau nan hmalakna an kalpui thin thu a tarlang a. PMAY-G hnuai ah kum 2021-22 chhung khan insak tanpuina chhungkaw 353 hnen ah pekchhuah a nih thu te a sawi. Pu Goerge Lalhruaia, SDO, PHED tarlan danin Kolasib district chhunga khaw 48-a in 9,038 zing a 8,738 chu tui herh haw theih a thlunzawm tawh an nih thu leh a dang 301 chu thlunzawm thuai tur a hmalak mek a nih thu a sawi a. Thianghlimna kawnga hmasawnna a awm theih nan inthiarna (Individual Househould Latrine) unit 3,390, vantlang inthiarna 34 siam a nih bak ah Soak Pit unit 100 siam a nih thu a sawi. Dr Lalhruaipuii, Senior Scientist, ICAR chuan Zorin bean, Puakzo leh Mimpui chi (Variety) tha siam chhuah nana zirbingna kalpui a nih dan te leh hlawk zawk a huan, lo, ram enkawl a nih nana ICAR hmalakna hrang hrang tarlanna hun a nei a, Saiphaia loneitu 12 thlanchhuahte nen Integrated Farming kalpui mek a nih thu a sawi bawk a ni.

Vawiin Kolasiba National Civil Services day 2023 pual a hun hmanna ah hian Sawrkar hnathawk tha leh an hna chanvo hlenchhuak that vanga chawimawina lo dawng tawh te hnen ah lawmpuina thu ziak hlan an ni a. Chungte chu Dr. Michelle C Lallawmkimi, Senior Scientist & Head, KVK, Pu V.L.Dawngkima, Sub Inspector, Pi Vanlalchhuangi, Anganwadi Worker, Kolasib AWC-XII,  Thingdawl ICDS Project – Women & Child Development leh    Public Health Engineering Department, Kolasib Watsan Division-te an ni.