175/2023-2024

Champhai, the 21st April, 2023: District Legal Services Authority (DLSA), Champhai bultumin vawiin chawhnu dar 2 khan Champhai Judicial District huam chhunga pawikhawihna tuartu mi 26 te hnenah zangnadawmna, victims of crime compensation Rs 87,25,000/- (cheng nuai sawmriat pasarih singhnih leh sangnga) sem chhuah a ni.

He hun hmanpuitu District & Sessions Judge Pu Liansangzuala chuan Dan-in thil tisualtu hrem mai bakah pawikhawihna tuartute dikna leh zahawmna vawn nun a duh thu sawiin, hemi buaipui tur hian zangnadawmna dawngtu tur thlangtu committee din a ni a, chumi mil chuan zangnadawmnate pek chhuah thin a ni, a ti a. Mizoram Victims of Crime Compensation Scheme, 2011 hnuaia Sawrkarin pawikhawihna tuartute zangnadawmna tur cheng nuai 100 a pek chhuah atanga cheng nuai 87.25 lai Champhai Judicial District huamchhunga pawikhawihna tuartu mi 26 te'n an dawng thei chu lawmawm a tih thu a sawi bawk.

DLSA Champhai Chairman ni bawk chuan Victim compensation chu pawikhawihna tuartute zangnadawmna atana scheme duan a nih thu sawiin, pawikhawihtute hrem mai piah lamah pawikhawihna tuartute chawmdawlna turin victim compensation hi duan a ni, a ti a. Victim compensation hmuh beisei avanga inpuhna diklo leh complaint diklo siamtute dan anga hrem theih an nih thu a sawi bawk a. Dan in inkaihhruaina a siam angin pawikhawihna tuartute kutah ngei zangnadawmna hlan a nih theih nana hmalak a nih thu sawiin, sumfaia lak tur bakah fixed deposit-a dahsak lakchhuahna tur receipt felfai tak siama hlan chhuah vek an nih thu a sawi bawk.

He hun District & Sessions Judge, Champhai Office, Zote-a hman hi CJM Pu V. Vanlalhriata, Secretary, DLSA Champhai chuan a kaihruai a. Sub-Hqrs. MHIP Champhai President Pi Lalhmachhuani Varte in thu a sawi bawk a. Zangnadawmna dawngtute atangin thusawi ngaihthlak ni bawkin, Sawrkar, DLSA bakah puitu hrang hrang leh hnemtute chungah lawmthu an sawi a. Pi Sylvie Zomuanpuii Ralte, Addl. District & Sessions Judge chuan lawmthu sawiin hun hman hi a khar a ni.

He hun hi Pi Jothansangi Tlau, Judicial Magistrate First Class Champhai, Dr. Lallawmkima, DIPRO Champhai leh NGO hruaitute'n an telpui bawk a ni.