176/2023-2024
Aizawl, the 21st April 2023: Vawiin chawhnu khân Mizoram Pollution Control Board leh Mizoram EIACP Hub tangkawp chuan ‘Earth Day 2023’ denchhenin Mizoram sawrkâr office awmna hmunpui Mizoram New Capital Complex (MINECO), Khatlâah hmankhat daih sarâng (Single Use Plastics) bawlhhlawh then fai hnatlâng a huaihawt a. He hnatlângah hian MPCB staff 45 chuang thawk chhuakin group hrang hrangah inthen darhin MINECO huam chhûnga kawng dung leh luikawrte atangin hmankhat daih sarâng bawlhhlawh thahnem tak chhar khâwmin, bawlhhlawh sawngbâwlna hmun Tuirial-ah an paih leh a ni.
Earth Day, 2023 hi naktûk April 22 hian khawvêl pumah ‘Invest In Our Planet’ tih thupui nen hman a ni dawn a ni.
Earth Day, 2023 denchhen hian Mizoram EIACP Hub chuan Mizoram chhûnga Eco-club zirlai naupangte tân inelna ‘Online Article Drawing Competition’ leh ‘Online Poster Making Competition’ plastic bawlhhlawh tihrêm leh plastic thlâkna tur tih thupui hmangin a buatsaih bawk a ni.
