177/2023-2024

Champhai, the 21st April, 2023: District Disaster Management Authority (DDMA), Champhai buatsaihin vawiin khan chhiatrupna thlen thulha midangte pui thuai tur leh chhiatrupna tawkte thian tia vuah, Aapda Mitra Volunteer-te tan training buatsaih a ni. A hawnna hun chawhma dar 10:30 a CHANEM tuala neih hi Addl. DC Pu M.Misael, Chief Executive Officer, DDMA, Champhai chuan khuallian niin a hmanpui a ni.

A hawnna hun Pu VL. Hruaimawia, District Organizer, DM&R Champhai kaihhruaiah Khuallian Pu M.Misael chuan khawvel changkang zelah chhiatrupna thlen thulha che chhuak tur thiamna bik neite chher chhuah thin an nih thu sawiin, chhiatna nasa zawk pumpelh nan a remchang a piangte penchhuak mai lova, training neite chauh an chetchhuah theih nana hmalak a pawimawh thu a sawi a. Mizoram chu seismic zone V hnuaia awm kan nih avangin engtiklai pawha chet la thei tura inralrin a tul thu leh, fur ruahtui tlain chhiatrupna a thlen theihte laka inpuahchah lawk a tul thu a sawi bawk.

DDMA Champhai Chief Executive Officer chuan chhiatrupna thleng thin zawng zawngte ven sen vek a nih loh thu sawiin, chhiatna thleng bawhzui leh chetlak kawnga inzirtirna tha pekin awmzia thui tak a neih thu a sawi a. Chhiatrupna thlen thulha che chhuak thinte tan mahni himna ngai pawimawha rilru fim tak pu chunga chetlak thiam a pawimawh thu sawiin, himna tura tul safety measure-te kan ngaipawimawh hram hram thin tur a ni, a ti a. Aapda Mitra volunteer-te chu Champhai District tana thlamuanpui tham an nih thu sawiin, hriselna, fitness leh inthununna tha vawngnung zel turin a fuih a. Ruihhlo leh a kaihhnawih laka fihlim turin a chah bawk a. Midangte tana malsawmna hna ropui tak thawktu tur an nih avangin inpekna nen thahnemngai taka training hun hmang theuh turin a chah a ni.

Hawnna hun hman zawh hnu hian Ruantlang kai Tiau lui leh a chhehvelah chhiatrupna thlen thulha chetlak dan tur training neiin, rope knot, rope rescue, water rescue leh driving practice-te an zir a. Aapda Mitra Volunteer-te puala first responder training leh refresher program buatsaihah hian Aapda Mitra Volunteer first leh second batch member 72 an tel thei a ni.