178/2023-2024

Aizawl, 21.04.2023: Chief Minister Pu Zoramthanga chuan vawiin khan Aizawla Civil Services Day lawmna, ATI Auditorium a buatsaih chu khuallian niin a hmanpui.

Chief Minister chuan sawrkar hnathawk kalkhawmte chu Civil Services Day chibai bukin, mipui rawngbawl hna an thawhna kawngah theihtawp chhuah zel turin a chah a. Mipui rawngbawltu tha ni tur chuan mahni hmasial lova midang thatna tur ngaihtuah leh dawhtheihna neih chu a pawimawh ber thu a sawi a. Civil service chu mipui rawngbawlna a ni tih rilru ah pai rengin, mahni tang hma hai lovin, mahni chunga thleng tura kan duh loh chu midang chunga ti lovin, rinawm taka hna thawk turin kalkhawmte chu a chah a ni. Chief Minister chuan Mizoram in hma a sawn zelna tura sawrkar hnathawkte mawhphurhna sawi tel bawkin, Mizoram in hmasawnna tur resource a neih hrang hrang te hi a nihna anga hman a nih theih nan kan zawn theuh ah hmatlhir thui tak nei chunga thawh a pawimawh thu a sawi.

He hun kaihruaitu Chief Secretary chuan Civil Services Day tobul leh pawimawhnate a sawi a. Civil service hna thawktu tam tak hi eizawnna dang sang tak tak leh hlawk tak tak pawh thawk thei ni mahse mahni mihringpui te that na turin, ram leh khawtlang tan thil tha thawk a tihhmasawnna kawnga tha thawh ve duh avanga lut an nih thu a sawi a. Ram inrelbawlna khawlah mawhphurhna pawimawh tak tak chang an nih avangin an hnathawh ah thleibik nei lovin, mi laktlak leh rintlak tak ni chungah dan zahawmna vawnghim chunga hna thawk zui zel turin kalkhawmte a chah a ni.

Sawrkar Website tha lawmman - Government Website Excellence Awards 2022-2023 semna hun neih a ni bawk a. He award hi category pahnih - official department website leh official institutional website-ah then niin, tehfung hrang hrang (web presence, interactions, transaction, transformation) hman a ni. Lawmman pakhatna atanga sawmna dawngtute chu hetiang hi an ni:

Category 1 - Official Department Website:

1st) Mizoram Public Service Commission (mpsc.mizoram.gov.in)
1st) Environment, Forests & Climate Change Department (forest.mizoram.gov.in)
2nd) Labour Employment, Skill Developemnt and Entrepreneurship Department (lesde.mizoram.gov.in)
3rd) Transport Department (transport.mizoram.gov.in)
4th) Vigilance Department (vigilance.mizoram.gov.in)
5th) Public Health Engineering Department (phed.mizoram.gov.in)
5th) Department of Personnel & Administrative Reforms (dpar.mizoram.gov.in)
6th) Power & Electricity Department (power.mizoram.gov.in)
7th) Excise & Narcotics Department (excise.mizoram.gov.in)
8th) Health & Family Welfare Department (health.mizoram.gov.in)
9th) Mizoram State Sports Council(sportscouncil.mizoram.gov.in)
10th) Food, Civil Supplies & Consumer Affairs Department (fcsa.mizoram.gov.in)

Category 2 - Official Institutional Website:

1st) Govt. Hrangbana College (ghbc.edu.in)
2nd) Zoram Medical College (zmc.edu.in)
3rd) Govt. Aizawl College (gac.ac.in)
4th) Govt. Mizoram Law College (mic.mizoram.gov.in)
5th) Govt. T. Romana College (trcollege.edu.in)
5th) Govt. J. Buana College, Lunglei (jbc.edu.in)
6th) Regional Institute of Paramedical & Nursing Sciences (ripans.ac.in)
7th) Pachhunga University College (pucollege.edu.in)
8th) IGNOU Regional Centre, Aizawl (ignouaizawl.ac.in)
9th) Govt. Hnahthial College (hnahthialcollege.edu.in)
10th) DIET, Lawngtlai (dietlawngtlai.mizoram.gov.in)

Civil Services Day hi mipuite rawngbawl tura inhlantharna ni atan hman thin a ni a. India ramin zalenna a chan hnu a Home Minister hmasa ber Sardar Vallabhbhai Patel'an Administrative Services Officer-te hmaah Delhi Metcalf Hall-a thu a sawi ni April ni 21, 1947 chu Civil Services Day lawmna ni atan hian hman a ni a. Mizoramah pawh vawiin hian district tinah hman niin, vawiina Chief Minister ho a inkhawmah hian department hrang hrang atangin an kalkhawm a ni.

Dr. Lalthlamuana, Chief Informatics Officer, ICT hnen atangin "Presentation on Digital Platform - Utility, Challenges & Way Forward" tih thupui ngaihthlak a ni a. Chawhnu lamah Pu K. Vanlalthiana, Jt. Director, LR&S hnen atangin "National Generic Document Registration System" chungchang ngaihthlak a ni bawk a. LAD Director Pi Rita Lalnunmawii Pachuau chuan Ngopa khua in India ram pum huap National Panchayat Award 2023 lawmman pakhatna an lak dan chungchang sawi bawkin, ATI Director Pi Maria CT Zualai hnen atangin "Best practices in the Villages with emphasis on Health, Education, Veterinary - a case presentation on Rengtekawn, Hnahlan & Muthi villages' tih presentation ngaihthlak a ni bawk. DP&AR Secretary Pu R. Lalramnghaka chuan lawmthu sawiin hun a khar a ni.